Një studim i ri tregon se tri herë më shumë vdekje nga kanceri i mushkërive mund të parandalohen nëse çdo person i kualifikuar i nënshtrohet një skanimi CT të dozës së ulët.
Aktualisht, vetëm një në pesë amerikanë që plotësojnë kriteret për depistim u kontrolluan në vitin 2024, sipas të dhënave të publikuara në “Journal of the American Medical Association”.
Rritja e depistimit në 100% do të trefishonte numrin e jetëve të shpëtuara dhe viteve të jetës së fituara, shkruan burimi Health Day transmeton Gazeta Shneta.
Priti Bandi nga Shoqata Amerikane e Kancerit u shpreh se niveli i ulët i depistimit është një mundësi e humbur, pasi shumë më tepër jetë mund të shpëtoheshin nëse depistimi do të kryhej rregullisht.
Kanceri i mushkërive është shkaku kryesor i vdekjes nga kanceri në SHBA, me rreth 125,000 vdekje në vitin 2025 dhe 225,000 raste të reja çdo vit.
Studimi analizoi të dhënat e Anketës Kombëtare të Shëndetit 2024 dhe tregoi se afro 13 milionë amerikanë janë të kualifikuar për depistim, por vetëm 19% e kanë kryer atë. Nëse depistimi do të arrinte 100%, gati 30,000 vdekje shtesë do të parandaloheshin dhe mbi 482,000 vite jetë do të fitoheshin.
Ekspertët theksojnë nevojën për rritjen e aksesit në shërbimet shëndetësore dhe sigurimin që depistimet të jenë të mbuluara plotësisht.
Shoqata Amerikane e Kancerit thekson se eliminimi i kostove për depistimin dhe testet pasuese mund të jetë kyç për uljen e vdekjeve dhe përmirësimin e shëndetit publik. /Gazeta Shneta/