Një analizë e re ka zbuluar se gratë që ndalojnë marrjen e barnave të humbjes së peshës – si Ozempic dhe Wegovy – para ose herët gjatë shtatzënisë shtojnë më shumë peshë dhe përballen me rreziqe më të larta shëndetësore krahasuar me gratë që nuk kanë përdorur kurrë këto ilaçe.
Studimi i botuar në “JAMA”, tregon se gratë që ndërprenë agonistët GLP-1 patën rrezik më të lartë për lindje të parakohshme, diabet gjatë shtatzënisë dhe probleme si hipertensioni dhe preeklampsia, shkruan burimi Euronews Health transmeton Gazeta Shneta.
Ilaçet GLP-1 ndihmojnë në humbje peshe duke ulur oreksin, por mjekët këshillojnë që ato të ndërpriten para shtatzënisë për shkak të mungesës së të dhënave për sigurinë tek fetusi.
Megjithatë, ndërprerja e tyre shpesh shkakton rikthim të peshës, gjë që ka hapur debat mbi mënyrën e menaxhimit të periudhës rreth konceptimit.
Studimi analizoi afro 1,800 shtatzëni nga vitet 2016–2025 dhe gjeti se gratë që ndaluan GLP-1 shtuan mesatarisht 3.27 kg më shumë se gratë që nuk i kishin marrë.
Ato patën gjithashtu 32% rrezik më të lartë për të shtuar më shumë peshë se sa rekomandohet, 30% rrezik më të lartë për diabet gestacional, 29% rrezik më të lartë për çrregullime hipertensioni dhe 34% rrezik më të lartë për lindje të parakohshme. Nuk u gjetën ndryshime në normat e prerjes cezariane apo në peshën dhe gjatësinë e foshnjave.
Studiuesit thonë se nevojiten kërkime të mëtejshme për të gjetur mënyra më të sigurta të menaxhimit të peshës gjatë shtatzënisë kur ndërpriten medikamentet GLP-1. /Gazeta Shneta/