Kosova vazhdon të mbetet vend me shkallë të ulët të epidemisë së HIV/AIDS, por të dhënat e këtij viti tregojnë një rritje të rasteve të reja. Vetëm gjatë vitit 2025 janë regjistruar 31 raste të reja dhe gjashtë viktima si pasojë e AIDS-it.
Këto të dhëna u prezantuan në tryezën e organizuar nga Ministria e Shëndetësisë dhe Instituti Kombëtar i Shëndetësisë Publike të Kosovës, me rastin e shënimit të 1 Dhjetorit – Ditës Botërore kundër HIV/AIDS.
Sipas Luljeta Gashit nga Departamenti i Epidemiologjisë në IKSHPK, Kosova ka prevalencë nën 1% në popullatën e përgjithshme, megjithatë rastet vazhdojnë të shfaqen kryesisht tek moshat e reja, shkruan Gazeta Shneta.
Moshat më të prekura janë 25–35 vjeç, ndërsa 82% e të infektuarve i takojnë gjinisë mashkullore.
Që nga viti 1986 e deri në vitin 2025 në vend janë raportuar gjithsej 246 raste me HIV/AIDS, ndërsa 57 persona kanë humbur jetën si pasojë e infeksionit. Komuna me numrin më të madh të rasteve mbetet Prishtina (76 raste), e ndjekur nga Prizreni (32 raste), duke reflektuar se HIV/AIDS vazhdon të ketë përhapje më të theksuar në zonat urbane.
Sipas të dhënave të IKSHPK-së, rrugët kryesore të transmetimit mbeten marrëdhëniet heteroseksuale (48%), të ndjekura nga marrëdhëniet homoseksuale (35%).
1 Dhjetori shënohet globalisht si dita e ndërgjegjësimit kundër HIV/AIDS, me qëllim sensibilizimin, parandalimin dhe ofrimin e qasjes më të gjerë në testim dhe trajtim./Gazeta Shneta/