Një studim i ri amerikan ka zbuluar se deri në 25% të rasteve të kancerit të gjirit diagnostikohen tek gratë më të reja se 50 vjeç – një zbulim që po nxit thirrje për rishikimin e udhëzimeve të skriningut.
Hulumtimi, i prezantuar në takimin vjetor të Shoqatës Radiologjike të Amerikës së Veriut, analizoi të dhënat nga shtatë qendra ambulantore në rajonin e Nju Jorkut gjatë periudhës 2014–2024.
Studiuesit gjetën se 20% deri në 24% e rasteve të reja të kancerit të gjirit u zbuluan tek gratë e moshës 18 deri në 49 vjeç, shkruan HealthDay transmeton Gazeta Shneta.
Sipas autores së studimit, radiologes Dr. Stamatia Destounis, rezultatet tregojnë se një pjesë e konsiderueshme e këtyre rasteve, veçanërisht tek gratë nën 40 vjeç, janë kancere invazive dhe agresive, përfshirë edhe llojin triple-negative, i cili është më i vështirë për t’u trajtuar.
Aktualisht, udhëzimet në SHBA rekomandojnë mamografi çdo dy vjet duke filluar nga mosha 40 deri në 74 vjeç. Megjithatë, studimi sugjeron se vetëm mosha nuk duhet të jetë kriteri kryesor për të vendosur se kur duhet bërë skriningu.
“Ky studim tregon qartë se gratë nën 50 vjeç nuk duhet të konsiderohen automatikisht si grup me rrezik të ulët”, ka theksuar Dr. Destounis, duke shtuar se gratë me histori familjare të kancerit të gjirit, mutacione gjenetike apo prejardhje etnike të caktuara mund të përfitojnë nga vlerësimi i hershëm i rrezikut dhe skriningu më i shpejtë.
Studiuesit theksojnë se gratë e reja duhet të edukohen për kontrollin vetjak të gjirit dhe të konsultohen me mjekun për rrezikun individual, sidomos kur kanë faktorë shtesë rreziku./Gazeta Shneta/