Një studim i ri ka zbuluar se stresi kronik mund të rrisë ndjeshëm rrezikun e goditjes në tru, veçanërisht tek gratë.
Sipas ekspertëve, edhe pse stresi nuk e shkakton drejtpërdrejt goditjen në tru, ai ndikon në faktorë që e shtojnë rrezikun, si tensioni i lartë i gjakut, inflamacioni dhe zakonet e pashëndetshme të jetesës. Këto elemente së bashku mund të krijojnë një terren të favorshëm për probleme serioze shëndetësore, shkruan Health transmeton Gazeta Shneta.
Raporti, i publikuar më 5 mars në revistën “Neurology”, tregoi një lidhje të qartë midis niveleve të larta të stresit dhe rritjes së rrezikut të goditjes në tru tek gratë e moshës 18–49 vjeç. Ky zbulim është veçanërisht i rëndësishëm, pasi goditja në tru zakonisht lidhet me moshën më të avancuar, por studimi sugjeron se gratë e reja mund të jenë më të prekshme ndaj efekteve të stresit kronik.
Në kontrast, studiuesit nuk gjetën asnjë lidhje të ngjashme mes stresit dhe rrezikut të goditjes në tru tek burrat, duke ngritur pyetje mbi faktorët biologjikë ose hormonalë që mund të ndikojnë te gratë në mënyrë të veçantë.
Dr. Lauren Patrick, profesoreshë asistente e neurologjisë në Universitetin e Kalifornisë, San Francisko, theksoi rëndësinë e menaxhimit të stresit si pjesë e parandalimit. “Stresi psikologjik i vazhdueshëm mund të dëmtojë funksionimin e enëve të gjakut, ndaj menaxhimi i tij është thelbësor për të ulur rrezikun e goditjes në tru,” u shpreh ajo.
Këto gjetje nënvizojnë nevojën për ndërgjegjësim më të madh dhe strategji të qëndrueshme për reduktimin e stresit, veçanërisht tek gratë në moshë të re. /Gazeta Shneta/