Agjencia e Ushqimit dhe Veterinarisë e Republikës së Kosovës (AUV), bazuar në njoftimin e pranuar nga Komisioni Evropian përmes Sistemit të Paralajmërimit të Shpejtë për Ushqim (RASFF), njofton opinionin publik se gjatë kontrollit të një ngarkese të mishit të pulës (MDM), të importuar nga Polonia, është konstatuar prania e bakterit Salmonella spp.
Produkti është prodhuar nga kompania CEDROB S.A., Ubojnia Drobiu Ujazdówek, ndërsa importi është realizuar nga kompania KAJMAK SHPK nga Prizreni.
Pas pranimit të njoftimit nga RASFF dhe pas inspektimeve të kryera nga AUV, me kërkesë të importuesit, është konfirmuar prania e salmonelës në sasinë prej 2,064 kilogramë mish pule. E gjithë sasia e kontaminuar është asgjësuar në përputhje me legjislacionin në fuqi dhe standardet e sigurisë ushqimore.
AUV njofton se vazhdon monitorimin e vazhdueshëm të produkteve ushqimore të importuara dhe bashkëpunimin me institucionet vendore dhe ndërkombëtare, me qëllim të parandalimit të rasteve të ngjashme dhe garantimit të sigurisë ushqimore në përputhje me standardet evropiane.
