Ushtrimi fizik mund të ndihmojë ndjeshëm në reduktimin e simptomave të depresionit dhe në shumë raste, të jetë po aq efektiv sa terapia psikologjike apo mjekimi, sipas një rishikimi të ri shkencor.
Aktiviteti fizik po merr gjithnjë e më shumë vëmendje si një mënyrë mbështetëse për trajtimin e depresionit, qoftë i kombinuar me trajtime të tjera apo edhe i vetëm në raste të caktuara, shkruan burimi Euronews Health transmeton Gazeta Shneta.
Rishikimi u krye nga Cochrane, një organizatë jofitimprurëse e njohur për kërkime shkencore, dhe përfshiu 73 studime klinike me rreth 5,000 të rritur që vuajnë nga depresioni.
Rezultatet treguan se nuk kishte pothuajse asnjë ndryshim mes ushtrimit fizik dhe trajtimeve standarde, si terapia psikologjike apo ilaçet, në uljen e simptomave si lodhja, trishtimi, pagjumësia dhe ndjenja e pashpresës.
Sipas autorit kryesor Andrew Clegg, ushtrimi është një alternativë e sigurt dhe e aksesueshme për menaxhimin e depresionit. Megjithatë, studiuesit paralajmërojnë se numri i studimeve me cilësi të lartë është ende i kufizuar dhe efektet afatgjata nuk janë plotësisht të qarta.
Analiza tregoi se ushtrimet me intensitet të lehtë deri në mesatar janë më të dobishme sesa ato shumë intensive.
Programet që kombinojnë ushtrime aerobike dhe forcë rezultuan më efektive se ushtrimet aerobike të vetme.
Ushtrimi fizik rekomandohet gjerësisht në praktikën klinike nga organizata ndërkombëtare shëndetësore, veçanërisht për depresionin e lehtë deri në mesatar, duke e bërë atë një mjet të rëndësishëm në përmirësimin e shëndetit mendor. /Gazeta Shneta/