Ministria e Shëndetësisë ia ka ‘trashë’ kontratën kompanisë “Termomontimi” me aneks kontratën e dytë me vlerë mbi 97 mijë Euro.
Kontrata fillestare ishte mbi 300 mijë Euro më e shtrenjtë sesa ofertat tjera. Asaj iu shtuan edhe 67 mijë Euro me një aneks kontratë në tetor të vitit të kaluar, e dje ia ‘trashën’ edhe me një aneks tjetër me vlerë mbi 97 mijë Euro, shkruan Gazeta Shneta.
Kjo është historia e renovimit të depos së barnave nga kompania “Termomontimi” e shpërblyer nga Ministria e Shëndetësisë me kontratën fillestare prej 1,770,554.42 Euro në qershor të vitit 2025.
Por 1,770,554.42 nuk i mjaftuan dhe në tetor i kërkoi Ministrisë së Shëndetësisë edhe një ankes kontratë për punë të paparashikuara me vlerë prej 67,877.75.
Dhe dje, sërish MSh e shpërbleu me një aneks kontratë të re për punë të paparashikuara me vlerë 97,163.51.00.
“Kompania TERMOMONTIMI SH.P.K. eshte punekryes sipas kontrates me nr. 206-24-13446-5-11_C855 ne vleren e kontraktuar 1,770,554.42 euro, per Renovimin e objektit te depos se Barnave dhe ndërtimi i aneksit. Gjatë ekzekutimit te punëve, janë paraqitur Punë Shtesë dhe Punë te paparashikuara, ne vleren e parashikuar 97,163.51.00 euro ose 5.49% e vlerës se kontrates bazë, me te cilat kompletohet projekti dhe teknikisht duhet te kryhen nga i njejti OE meqense jane te nderlidhura me punet e kontrates bazë. Aneksi i pare per kete kontrate ka qene 67,877.75 euro ose 3.83% + 5.49% = 9.32% totali i puneve shtese. Sqarim Objekti eshte shpronesuar nga AKP dhe pritet te funksionalizohet per nevoja te sistemimit te barnave dhe materialit shpenzues medicinal”, thuhet në njoftimin e Zyrës së Prokurimit të MSh-së në Njoftimin për Dhënie të Kontratës.
Kompania “Termomontimi” ishte shpërblyer edhe nga Spitali i Prizrenit me vlerë 2.2 milionë Euro për renovime. /Gazeta Shneta/