Studiues nga Universiteti i Cambridge-it në Mbretërinë e Bashkuar analizuan ndikimin e menopauzës mbi trurin, duke përfshirë gra që përdornin terapi hormonale (HRT) dhe ato që nuk e përdornin.
Menopauza lidhet me ulje të vëllimit të masës gri në rajone të trurit që lidhen me sëmundjen e Alzheimerit. Megjithëse gratë që përdornin terapinë HRT shfaqën një përmirësim të lehtë në kohën e reagimit, terapia hormonale nuk duket se rikthen ndryshimet cerebrale të shkaktuara nga menopauza, shkruan burimi Medical News Today transmeton Gazeta Shneta.
Menopauza zakonisht ndodh midis moshës 45–55 vjeç, dhe ulja e estrogjenit dhe progesteronit mund të shkaktojë afshe të nxehta, probleme gjumi, “mjegull mendore” dhe ndryshime në humor.
HRT përdoret shpesh për të menaxhuar këto simptoma dhe mund të përfshijë estrogjen vetëm ose kombinim estrogjen-progesteron.
Në studim u analizuan të dhëna nga afërsisht 125,000 gra të regjistruara në ‘UK Biobank’, të ndara në tre grupe: para-menopauzës, pas-menopauzës pa HRT, dhe pas-menopauzës me HRT.
Gratë plotësuan pyetësorë për gjumin, humorin, ankthin dhe stilin e jetës, si dhe teste njohëse që vlerësuan kujtesën dhe shpejtësinë e të menduarit.
Një pjesë e tyre iu nënshtrua skanimeve MRI për të matur vëllimin e masës gri në rajone të lidhura me kujtesën dhe rregullimin emocional.
Rezultatet treguan se pas menopauzës, gratë shfaqën rënie të kujtesës, shpejtësisë së të menduarit dhe kohës së reagimit krahasuar me grupin para-menopauzës.
Ulja e kohës së reagimit ishte pak më e vogël tek gratë me terapi HRT. Gjithashtu, gratë pas menopauzës raportuan gjumë më të keq dhe nivele më të larta lodhjeje, veçanërisht ato që përdornin HRT.
Këto gjetje sugjerojnë se menopauza ka ndikim të rëndësishëm neurologjik, duke ndikuar në funksionet njohëse, dhe sado që HRT mund të lehtësojë disa simptoma, nuk ndalon ndryshimet cerebrale të lidhura me menopauzën. /Gazeta Shneta/