Një studim i ri shkencor sugjeron se përdorimi i inteligjencës artificiale për këshilla mjekësore duhet të bëhet me kujdes. Sipas hulumtimit të publikuar në revistën “Nature”, sistemi ChatGPT Health nuk arrin gjithmonë të identifikojë situatat kur përdoruesit kanë nevojë për ndihmë urgjente mjekësore.
Sipas të dhënave të OpenAI, më shumë se 230 milionë njerëz në javë përdorin ChatGPT për pyetje që lidhen me shëndetin, si për shembull nëse një ushqim është i sigurt për t’u konsumuar, si të menaxhohen alergjitë ose si të trajtohet një ftohje.
Megjithatë, studimi zbuloi se edhe pse sistemi funksionon mirë në raste të qarta dhe tipike, ai nënvlerëson më shumë se gjysmën e situatave që kërkojnë trajtim urgjent, raporton Euronews Health transmeton Gazeta Shneta.
Studiuesit analizuan 60 skenarë klinikë të strukturuar nga 21 specialitete mjekësore, duke përfshirë raste nga probleme të lehta që mund të trajtohen në shtëpi deri te emergjencat e vërteta mjekësore.
Rezultatet treguan se sistemi jepte këshilla të sakta në raste të dukshme si goditja në tru apo reaksionet e rënda alergjike. Por në situata ku rreziku nuk ishte menjëherë i dukshëm, si në disa raste të astmës, ai sugjeronte pritje në vend që të rekomandonte trajtim urgjent.
Studimi shqyrtoi gjithashtu mënyrën se si sistemi reagonte kur përdoruesit përmendnin mendime për vetëdëmtim. Edhe këtu u vunë re rezultate të paqëndrueshme, pasi mesazhet që inkurajonin kërkimin e ndihmës profesionale nuk shfaqeshin gjithmonë.
Megjithatë, autorët e studimit nuk sugjerojnë që njerëzit të ndalojnë përdorimin e mjeteve të inteligjencës artificiale për informacion shëndetësor.
Ata theksojnë se këto teknologji duhet të përdoren si ndihmë shtesë dhe jo si zëvendësim për vlerësimin profesional të mjekëve, veçanërisht në raste simptomash serioze ose përkeqësimi të gjendjes shëndetësore. /Gazeta Shneta/