SHSKUK ka pranuar dhjetra punëtorë infermierë, laborant, fizioterapeutë e teknik, por vendet e punës së tyre ende nuk janë të lira. Atyre iu është thënë se duhet të presin derisa t’ju lirohen vendet.
Shërbimi Spitalor Klinik dhe Universitar i Kosovës ka dal me një njoftim të çuditshëm ku njoftohen kandidatët që janë pranuar në punë në konkursin me numër 9777 se ende nuk janë liruar vendet e tyre të punës, shkruan Gazeta Shneta.
Në këtë njoftim SHSKUK ka thënë se kandidatët e pranuar do të thirren për të filluar punën, sipas mundësive buxhetore të institucionit.
“Kandidatët të cilët kanë kaluar me sukses fazat e rekrutimit dhe janë renditur në listën përfundimtare do të njoftohen nga Zyra e Personelit e QKUK-së për fillimin e punës, në përputhje me mundësitë buxhetore për vitin 2026 dhe bazuar në renditjen përfundimtare të publikuar”, thuhet në njoftim.
SHSKUK e ka përdorur një term “konkurs me karakter vjetor” që deri më tani nuk njihet në proceset rekrutuese në institucionet publike.
“Ky konkurs ka karakter vjetor dhe, si i tillë, do të vazhdojë gjatë vitit me thirrjen e kandidatëve për plotësimin e vendeve të lira të punës, sipas renditjes në listën përfundimtare. Kandidatët që do të ftohen për punësim do të kontaktohen nga Zyra e Personelit e QKUK-së për procedurat e mëtejme administrative dhe për caktimin e datës së fillimit të punës”, thuhet në njoftim.
Në këtë konkurs janë pranuar në punës infermier me bachelor, infermier me shkollë të mesme, laborant mjekësor me bachelor, fizioterapeut me bachelor, teknik të fizioterapisë, teknik të radiologjisë me bachelor, mami dhe profile të tjera të ngjashme. /Gazeta Shneta/