Një qasje e re terapeutike për trajtimin e kancerit rektal të avancuar lokalisht (LARC) po jep rezultate premtuese, duke rritur mundësinë që pacientët të shmangin ndërhyrjet kirurgjikale të rënda dhe të ulin rrezikun e rikthimit të sëmundjes.
Sipas një studimi të fundit shkencor, kjo metodë e trajtimit mund të ofrojë një alternativë më efektive dhe më pak invazive për pacientët që përballen me këtë formë të kancerit, shkruan burimi Medical News Today transmeton Gazeta Shneta.
Trajtimi i njohur si trajtimi total neoadjuvant (TNT) përfshin një kombinim të radioterapisë me kurs të shkurtër dhe disa cikle kimioterapie. Kjo strategji synon të zvogëlojë ose eliminojë tumorin përpara se të merret në konsideratë ndërhyrja kirurgjikale.
Studimi u krye nga studiues të Universitetit Uppsala në Suedi dhe rezultatet e tyre u publikuan në revistën shkencore “eClinicalMedicine”. Gjatë hulumtimit, shkencëtarët ndoqën 273 pacientë me kancer rektal të avancuar dhe me rrezik të lartë për rikthim të sëmundjes.
Rezultatet treguan se trajtimi TNT arriti të reduktojë praninë e tumoreve në një nivel pothuajse dy herë më të madh krahasuar me metodat tradicionale të trajtimit. Kjo është veçanërisht e rëndësishme, pasi trajtimi standard për këtë lloj kanceri shpesh përfshin radioterapi të zgjatur ose kombinim të radioterapisë me kimioterapi, të ndjekur nga një operacion i ndërlikuar për heqjen e një pjese të zorrëve.
Sipas profesor Bengt Glimelius, autor kryesor i studimit dhe profesor i onkologjisë në Universitetin Uppsala, trajtimi TNT mund të sulmojë tumorin në mënyrë më efektive dhe në disa raste ta eliminojë plotësisht atë.
Në situata të tilla, operacioni mund të mos jetë më i nevojshëm, duke ruajtur funksionin normal të rektumit dhe duke shmangur ndërhyrjet invazive dhe pasojat e tyre për pacientët. /Gazeta Shneta/