Aktiviteti i gripit në Shtetet e Bashkuara po bie gradualisht, por autoritetet shëndetësore paralajmërojnë se vaksina e këtij sezoni nuk ka ofruar mbrojtjen e zakonshme.
Sipas të dhënave të publikuara nga Centers for Disease Control and Prevention (CDC), vaksina ka qenë vetëm 25% deri në 30% efektive në parandalimin e rasteve që kërkojnë trajtim mjekësor apo shtrim në spital tek të rriturit.
Tek fëmijët, mbrojtja ka qenë disi më e lartë, duke reduktuar rrezikun për trajtim mjekësor me rreth 40%.
Ekspertët theksojnë se zakonisht vaksinat konsiderohen të suksesshme kur arrijnë efektivitet prej 40% deri në 60%, ndërsa këtë vit niveli i mbrojtjes rezulton ndër më të ulëtit në dy dekadat e fundit.
Sipas specialistëve, arsyeja kryesore lidhet me një mospërputhje mes virusit që qarkulloi dhe atij që u parashikua nga shkencëtarët për përfshirje në vaksinë.
Varianti dominues këtë dimër ishte i tipit A H3N2, konkretisht një nënvariant i ri i njohur si “subclade K”, i cili u përhap me shpejtësi në fillim të sezonit. Ndërkohë, vaksina ishte dizajnuar për një version tjetër të këtij virusi, çka uli ndjeshëm efektivitetin.
Eksperti i vaksinave William Schaffner është shprehur se, pavarësisht kësaj mospërputhjeje, vaksinimi mbetet i rëndësishëm.
“Edhe kur vaksina nuk përputhet plotësisht me virusin, ajo ndihmon në uljen e rasteve të rënda,” ka deklaruar ai.
Të dhënat tregojnë se sezoni i gripit ka pasur ndikim të konsiderueshëm:
Të paktën 27 milionë raste të gripit
Rreth 350 mijë shtrime në spital
22 mijë viktima
Ndërkohë, këtë sezon kanë humbur jetën të paktën 101 fëmijë nga gripi. Në rastet ku statusi i vaksinimit ishte i njohur, rreth 85% e tyre nuk ishin plotësisht të vaksinuar.
Normat e vaksinimit mbeten relativisht të ulëta. Rreth 46.5% e të rriturve dhe 48% e fëmijëve kanë marrë vaksinën këtë sezon, shifra që sipas ekspertëve mund të kenë ndikuar në përkeqësimin e situatës.
Shkencëtarët tashmë kanë nisur përgatitjet për sezonin e ardhshëm.
OBSH ka rekomanduar që vaksinat për sezonin 2026–2027 të përfshijnë mbrojtje ndaj variantit “subclade K”, me qëllim rritjen e efektivitetit.
Autoritetet shëndetësore vazhdojnë të bëjnë thirrje për vaksinim, duke theksuar se ai mbetet mbrojtja më e mirë kundër komplikimeve serioze nga gripi./Gazeta Shneta/