Ndërsa mungesa e gjumit është e lidhur me shumë probleme shëndetësore, gjithnjë e më shumë studime po tregojnë se edhe gjumi i tepërt mund të jetë i dëmshëm.
Fjetja për më shumë se 9 orë në natë lidhet me rritje të rrezikut për sëmundje si diabeti, sëmundjet e zemrës dhe depresioni, shkruan Mayo Clinic, transmeton Gazeta Shneta.
Ekspertët theksojnë se gjumi i tepërt shpesh nuk është shkak, por simptomë e problemeve të tjera shëndetësore, përfshirë çrregullimet hormonale, sëmundjet kronike apo gjendjet e shëndetit mendor.
Një tjetër faktor është cilësia e gjumit. Edhe nëse një person fle gjatë, nëse gjumi është i fragmentuar ose jo i thellë, trupi nuk arrin të rikuperohet siç duhet.
Rekomandohet mbajtja e një rutine të rregullt gjumi, shmangia e ekraneve para gjumit dhe konsultimi me mjekun në rast se ndjehet nevojë e vazhdueshme për gjumë të tepërt.