Një program i ri shëndetësor i bazuar në një algoritëm të standardizuar ka arritur të përmirësojë ndjeshëm kontrollin e tensionit të gjakut tek rreth 90 mijë pacientë, duke sjellë përfitime të rëndësishme për shëndetin publik.
Studimi i publikuar në “BMJ Open Quality”, tregon se integrimi i një mjeti të strukturuar në sistemet elektronike të të dhënave shëndetësore ndihmon mjekët të trajtojnë hipertensionin në mënyrë më efektive dhe të qëndrueshme. Ky sistem u zbatua në rrjetin “University of California Health” dhe u testua për një periudhë dyvjeçare.
Hipertensioni, i njohur si tension i lartë i gjakut, prek pothuajse gjysmën e të rriturve dhe përbën një ndër shkaqet kryesore të sëmundjeve kardiovaskulare dhe vdekjeve të parakohshme. Megjithatë, vetëm një në katër persona arrin ta mbajë atë nën kontroll, shkruan Medical News Today transmeton Gazeta Shneta.
Algoritmi i ri, i quajtur “UC Way Hypertension Medication Algorithm”, u jep mjekëve udhëzime të qarta hap pas hapi për rregullimin e terapisë me barna, duke marrë parasysh edhe faktorë individualë si mosha apo sëmundjet shoqëruese. Ai është projektuar të jetë fleksibël dhe i zbatueshëm në shkallë të gjerë.
Rezultatet treguan një përmirësim të dukshëm: përqindja e pacientëve me tension të kontrolluar u rrit nga 68.5% në afro 74% deri në mesin e vitit 2025.
Kjo përkthehet në mijëra raste të parandaluara, përfshirë dhjetëra goditje në tru, infarkte dhe humbje jete.
Megjithatë, studiuesit theksojnë se pabarazitë mes grupeve të ndryshme të popullsisë vazhdojnë të ekzistojnë, duke nënvizuar nevojën për ndërhyrje më të synuara.
Përveç trajtimit me barna, ekspertët rekomandojnë edhe ndryshime në stilin e jetesës, si ndalimi i duhanit, kufizimi i alkoolit, ushqyerja e shëndetshme, aktiviteti fizik dhe monitorimi i rregullt i tensionit.
Studimi thekson se kombinimi i teknologjisë me kujdesin e mirëorganizuar mund të shpëtojë jetë dhe të përmirësojë ndjeshëm menaxhimin e hipertensionit. /Gazeta Shneta/