Një juri në Shtetet e Bashkuara ka vendosur se Meta ka dëmtuar me vetëdije shëndetin mendor të fëmijëve dhe ka fshehur informacione lidhur me shfrytëzimin seksual të tyre. Si rezultat, kompania u gjobit me 375 milionë dollarë (rreth 317 milionë euro).
Meta është një kompani e madhe teknologjike amerikane që zotëron disa platforma të njohura si Facebook, Instagram, WhatsApp dhe Messenger.
Sipas vendimit, Meta përdori praktika tregtare “të papranueshme”, duke përfituar nga dobësitë dhe mungesa e përvojës së fëmijëve.
Juria konstatoi gjithashtu mijëra shkelje të ligjit për praktika të padrejta në New Mexico, i cili mbron konsumatorët nga abuzimet tregtare, raporton Euronews Health transmeton Gazeta Shneta.
Padia u ngrit në vitin 2023 nga prokurori i përgjithshëm Raul Torrez, pas një hetimi ku u përdorën llogari të rreme që paraqiteshin si 14-vjeçarë.
Hetimi zbuloi se platformat i ekspozonin të rinjtë ndaj përmbajtjeve seksuale të papërshtatshme dhe i orientonin drejt grupeve të pamoderuara.
Gjatë procesit, juria shqyrtoi dokumente të brendshme dhe dëshmi nga drejtues të kompanisë, përfshirë Mark Zuckerberg, Adam Mosseri dhe Antigone Davis. U analizuan gjithashtu algoritmet e platformës dhe dështimi për të zbatuar kufizimet e moshës.
Meta ka kundërshtuar vendimin dhe pritet të apelojë. Një fazë e dytë e gjyqit do të zhvillohet në maj për të përcaktuar nëse platformat përbëjnë rrezik publik dhe nëse kompania duhet të financojë programe për të adresuar dëmet.
Ky rast është pjesë e një vale padish më të gjera, ku mbi 40 shtete amerikane akuzojnë Meta për nxitjen e problemeve të shëndetit mendor tek të rinjtë përmes dizajnit varësues të platformave si Instagram dhe Facebook. /Gazeta Shneta/