Rreth 10 për qind e operacioneve të planifikuara në Angli anulohen ose shtyhen vetëm një ditë para ndërhyrjes, sipas një studimi të ri mbi shërbimin shëndetësor publik britanik (NHS).
Hulumtimi, i cili ka analizuar të dhënat e 91 spitaleve, tregon gjithashtu se 9 për qind e ndërhyrjeve shtyhen gjatë fazës së kontrollit para operacionit, shkruan The Guardian, transmeton Gazeta Shneta.
Sipas autorëve të studimit, nëse këto shifra do të ishin të njëjta në nivel kombëtar, kjo do të nënkuptonte rreth 300 mijë operacione të anuluara ose të shtyra.
Megjithatë, studiuesit theksojnë se gati 40 për qind e këtyre rasteve mund të ishin shmangur me organizim më të mirë dhe identifikim më të hershëm të problemeve shëndetësore.
Arsyet kryesore të anulimeve përfshijnë gjendjen shëndetësore të pacientëve, mungesat e tyre, tejzgjatjen e listave operative dhe rastet urgjente që marrin prioritet.
Në shumë raste, pacientët kanë nevojë për analiza shtesë ose vlerësim specialistik, gjë që çon në shtyrjen e ndërhyrjeve.
Ekspertët e përfshirë në studim theksojnë se sistemi ka nevojë për ndryshime strukturore, përfshirë kontroll më të hershëm të pacientëve, planifikim më fleksibil të operacioneve dhe komunikim më të mirë mes shërbimeve shëndetësore.
Sipas tyre, përmirësimi i fazës para operacionit jo vetëm që ul numrin e anulimeve, por ndihmon edhe në përdorimin më efikas të kapaciteteve spitalore dhe në reduktimin e listave të gjata të pritjes./Gazeta Shneta/