Ministria e Shëndetësisë dhe Instituti Kombëtar i Shëndetësisë Publike të Kosovës, në bashkëpunim me Organizata Botërore e Shëndetësisë dhe UNICEF, kanë shënuar Javën e Imunizimit, duke ritheksuar rëndësinë e vaksinimit si një nga ndërhyrjet më efektive në mbrojtjen e shëndetit publik.
Me moton “Vaksinat mbrojnë në çdo moshë”, institucionet shëndetësore theksojnë se imunizimi është jetik gjatë gjithë jetës – nga fëmijëria e hershme deri në moshën e rritur, përcjell Gazeta Shneta.
Vaksinimi jo vetëm që parandalon sëmundje të rënda dhe komplikime, por ndihmon edhe në krijimin e imunitetit kolektiv në komunitet.
Sipas të dhënave zyrtare, gjatë vitit të fundit është shënuar progres në vaksinimin bazë të fëmijëve (0–1 vjeç), me rritje të dukshme krahasuar me vitet e kaluara. Ky zhvillim konsiderohet si tregues i rritjes së besimit të qytetarëve në sistemin shëndetësor dhe përmirësimit të qasjes në shërbimet e imunizimit.
Ministri i Shëndetësisë, Arben Vitia, tha se vaksinimi mbetet prioritet strategjik për vendin.
“Vaksinimi është një investim i drejtpërdrejtë në shëndetin e qytetarëve dhe në të ardhmen e vendit tonë. Ne do të vazhdojmë të forcojmë sistemin e imunizimit, duke siguruar qasje të barabartë dhe të sigurt për të gjithë”, theksoi ai.
Nga viti 2024, programi i imunizimit në Kosovë ka shënuar avancime të rëndësishme, përfshirë futjen e tri vaksinave të reja në kalendarin e rregullt. Një ndër zhvillimet kryesore është zgjerimi i vaksinimit kundër HPV, i cili tashmë përfshin edhe djemtë dhe është shtrirë deri në moshën 26 vjeç, në përputhje me rekomandimet ndërkombëtare.
Megjithatë, autoritetet shëndetësore kanë ngritur shqetësimin për rënien e mbulueshmërisë me vaksinën MMR, që mbron nga fruthi, shytat dhe rubella, duke rritur rrezikun për shpërthime të mundshme.
Drejtoresha ekzekutive e IKShPK-së, Ardita Baraku, bëri thirrje për mobilizim të përbashkët.
“Çdo dozë e papërfunduar rrit rrezikun për rikthimin e sëmundjeve të parandalueshme. Është thelbësore që qytetarët të informohen nga burime të besueshme dhe të sigurojnë vaksinimin në kohën e duhur”, tha ajo.
Ndërkohë, përfaqësuesja e UNICEF-it në Kosovë, Veronika Vashchenko, njoftoi për një fushatë plotësuese vaksinimi që synon të përfshijë rreth 1,000 fëmijë të pavaksinuar ose me vaksinim jo të plotë.
“Arritja e këtyre fëmijëve është thelbësore për të mbyllur boshllëqet në mbrojtjen ndaj sëmundjeve ngjitëse”, theksoi ajo.
Ndërsa shefja e zyrës së OBSH-së në Kosovë, Isme Humolli, rikujtoi ndikimin global të vaksinimit.
“Sipas vlerësimeve, gjatë 50 viteve të fundit vaksinimi ka kontribuar në uljen me rreth 40% të vdekshmërisë së foshnjeve në nivel global, duke shpëtuar miliona jetë”, u shpreh ajo./Gazeta Shneta/