Në Qendrën Klinike Universitare të Kosovës (QKUK), në kuadër të Repartit të Dializës, ka nisur realizimi i procedurës së plazmaferezës terapeutike (TPE) nga ekipi i mjekëve nefrologë.
Plazmafereza (TPE) është procedurë terapeutike ekstrakorporale, përmes së cilës largohet plazma e pacientit dhe zëvendësohet me solucione adekuate, me qëllim eliminimin e antitrupave, komplekseve imune dhe substancave të tjera patogjene nga qarkullimi i gjakut. Në shumë raste, kjo procedurë përdoret si trajtim jetëshpëtues, transmeton Gazeta Shneta.
Sipas njoftimit, realizimi i kësaj procedure mundëson trajtimin e sëmundjeve autoimune në disa fusha të mjekësisë, përfshirë nefrologjinë, neurologjinë, hematologjinë, reumatologjinë dhe gastroenterologjinë, si dhe përgatitjen e pacientëve për transplantim të veshkës.
Procedura është realizuar nga ekipi i përbërë nga Dr. Siada Selmani, Dr. Vjollca Godanci Kelmendi, Dr. Petrit Gjaka, infermierja Iliriana Nuredini dhe tekniku i aparaturës Afrim Rudi.
Me fillimin e realizimit të TPE-së, QKUK zgjeron kapacitetet profesionale dhe terapeutike në trajtimet ekstrakorporale. /Gazeta Shneta/