Një teknikë e re jo-invazive e stimulimit të trurit mund të ndihmojë në përmirësimin e simptomave të sëmundjes së Parkinsonit pa nevojën e ndërhyrjes kirurgjikale, sipas një studimi të publikuar në revistën shkencore eBioMedicine
Studiuesit kanë zhvilluar një metodë të quajtur stimulimi me ndërhyrje transkraniale (TIs), e cila përdor rryma elektrike të mbivendosura për të targetuar zona të thella të trurit nga jashtë kafkës, pa vendosjen e elektrodave në tru.
Sipas studimit, rreth 70 për qind e pjesëmarrësve kanë shfaqur përmirësim të dukshëm në simptomat motorike pas vetëm një seance trajtimi, krahasuar me 15 për qind që kanë raportuar përmirësim pas trajtimit placebo.
Sëmundja e Parkinsonit shkakton dridhje, ngurtësi të muskujve, ngadalësim të lëvizjeve dhe probleme me ekuilibrin dhe koordinimin.
Autori i studimit, Dr. Alvaro Pascual-Leone, tha se kjo qasje përfaqëson një mënyrë krejtësisht të re të neuromodulimit jo-invaziv që mund të arrijë zona të thella të trurit pa kirurgji.
Ndërkohë, studiuesi Brad Manor theksoi se kjo metodë mund të personalizohet sipas anatomisë së trurit të secilit pacient, duke e bërë trajtimin më të saktë dhe më efektiv.
Në studim janë përfshirë 30 pacientë me Parkinson në faza të hershme dhe të mesme, të cilët kanë marrë një seancë 20-minutëshe stimulimi në zonën e trurit të lidhur me kontrollin motorik.
Studiuesit thonë se rezultatet janë premtuese, ndërsa pritet të zhvillohen studime më të mëdha për të vlerësuar kohëzgjatjen e efektit dhe mënyrën optimale të aplikimit të kësaj terapie.