Manikyri dhe pedikyri mbeten ndër shërbimet më të përdorura të estetikës, por ekspertët paralajmërojnë se në disa raste mund të paraqesin rrezik për infeksione nëse nuk respektohen standardet e higjienës.
Sipas një analize të publikuar nga “The Conversation”, infeksionet mund të përhapen përmes pajisjeve të pa sterilizuara, sipërfaqeve të kontaminuara dhe kontaktit të drejtpërdrejtë me lëkurën gjatë trajtimeve.
Ekspertet Helen Banwell dhe Kristin Graham theksojnë se rreziku rritet kur gjatë manikyrit ose pedikyrit krijohen dëmtime të vogla në lëkurë apo kutikula, duke lehtësuar hyrjen e baktereve dhe kërpudhave.
Pedikyri konsiderohet më i rrezikshëm se manikyri, pasi këmbët shpesh qëndrojnë në ambiente të ngrohta dhe të lagështa, kushte të favorshme për zhvillimin e mikroorganizmave.
Infeksionet më të shpeshta përfshijnë infeksione bakteriale të lëkurës, infeksione fungale të thonjve dhe në raste të rralla komplikime më serioze, përfshirë edhe hospitalizime.
Autoritetet shëndetësore në Australinë Perëndimore kanë raportuar disa ankesa për infeksione pas shërbimeve në sallone, duke ngritur shqetësime për standardet e higjienës në disa raste.
Megjithatë, ekspertët theksojnë se rreziku mund të ulet ndjeshëm nëse sallonet respektojnë rregulla strikte të sterilizimit, përdorin pajisje njëpërdorimëshe dhe dezinfektojnë rregullisht hapësirat dhe instrumentet.
Sipas tyre, shumica e shërbimeve mbeten të sigurta, por klientët këshillohen të jenë të kujdesshëm dhe të zgjedhin sallone me standarde të larta higjienike.