Organizata Botërore e Shëndetësisë (OBSH) ka paralajmëruar se ushqimi i kontaminuar vazhdon të përbëjë një rrezik serioz global për shëndetin publik, duke shkaktuar rreth 1.5 milionë vdekje çdo vit në mbarë botën.
Sipas raportit të publikuar nga OBSH, ushqimet e ndotura me baktere, viruse, parazitë ose kimikate shkaktojnë gjithashtu rreth 886 milionë raste sëmundjesh çdo vit në 194 vende të botës, bazuar në të dhënat e periudhës 2000–2021, transmeton Gazeta Shneta.
Fëmijët nën moshën pesë vjeç rezultojnë më të prekurit, duke pasur gati tre herë më shumë rrezik për t’u sëmurur nga ushqimi i pasigurt.
OBSH thekson se Afrika dhe Azia Juglindore mbajnë barrën më të madhe të sëmundjeve dhe vdekjeve të lidhura me ushqimin, duke përbërë rreth 60% të rasteve fatale në nivel global.
Sipas raportit, shumica e rasteve të sëmundjeve ushqimore shkaktohen nga baktere dhe viruse, ndërsa një pjesë e konsiderueshme e vdekjeve lidhet me ekspozimin ndaj kimikateve si arseniku dhe plumbi.
Organizata paralajmëron se ndryshimet klimatike dhe rezistenca ndaj antibiotikëve po e përkeqësojnë situatën, duke rritur rrezikun e kontaminimit dhe vështirësuar trajtimin e infeksioneve.
OBSH vlerëson gjithashtu se sëmundjet e transmetuara nga ushqimi i pasigurt kanë shkaktuar humbje ekonomike globale prej rreth 647 miliardë dollarësh në vitin 2021.