Një studim i ri ka ngritur shqetësime lidhur me përdorimin e disa ilaçeve të zakonshme për trajtimin e tensionit të lartë te personat me diabet të tipit 2. Sipas gjetjeve, një grup medikamentesh të njohura si bllokuesit e kanaleve të kalciumit të tipit dihidropiridinë (DCCB) mund të lidhen me një përparim më të shpejtë të sëmundjes kronike të veshkave.
Diabeti i tipit 2 dhe hipertensioni shpesh shfaqen së bashku. Kur tensioni i lartë nuk kontrollohet mirë, ai mund të përshpejtojë dëmtimin e enëve të vogla të gjakut në veshka, duke rritur rrezikun për insuficiencë renale. Për këtë arsye, kontrolli i tensionit mbetet një nga masat më të rëndësishme për mbrojtjen e funksionit të veshkave, shkruan burimi Medical News Today.
Studiuesit analizuan të dhënat e mbi 31 mijë personave me diabet të tipit 2, të cilët po trajtoheshin me medikamente standarde për mbrojtjen e veshkave dhe kontrollin e glikemisë.
Nga këta, rreth 38% përdornin edhe ilaçe të grupit DCCB. Pas një ndjekjeje mesatare prej tre vjetësh e gjysmë, u vu re se përdoruesit e këtyre barnave kishin rreth 33% më shumë gjasa të përjetonin përkeqësim të rëndësishëm të funksionit të veshkave krahasuar me pacientët që merrnin terapi të tjera antihipertensive, transmeton Gazeta Shneta.
Megjithatë, ekspertët theksojnë se rezultatet duhet të interpretohen me kujdes.
Studimi nuk provon se këto ilaçe shkaktojnë drejtpërdrejt dëmtimin e veshkave dhe nevojiten kërkime të tjera më të mëdha për të konfirmuar gjetjet. Deri atëherë, pacientët nuk duhet të ndërpresin trajtimin pa u konsultuar me mjekun e tyre. /Gazeta Shneta/