Organizata Botërore e Shëndetësisë (OBSH) ka paralajmëruar se mbi 200 mijë persona kanë humbur jetën në Evropë si pasojë e temperaturave ekstreme gjatë katër viteve të fundit, ndërsa pothuajse të gjitha këto vdekje mund të ishin parandaluar me masa dhe politika të përshtatshme mbrojtëse.
Paralajmërimi u bë nga drejtori rajonal i OBSH-së për Evropën, Hans Kluge, gjatë prezantimit të udhëzuesit të ri për planet e veprimit ndaj valëve të të nxehtit, i cili synon të ndihmojë vendet në përballjen me rrezikun në rritje nga temperaturat ekstreme, shkruan Euronews Health transmeton Gazeta Shneta.
“Ndikimet e ndryshimeve klimatike janë një rrezik i qartë dhe i pranishëm, ndërsa manifestimi më i menjëhershëm dhe më vdekjeprurës i tyre është nxehtësia ekstreme”, deklaroi Kluge.
Sipas OBSH-së, valët e të nxehtit nuk konsiderohen më fenomene të rralla meteorologjike, por një krizë e përsëritur që po shkakton vuajtje, humbje jete dhe presion të madh mbi sistemet shëndetësore.
Evropa mbetet një nga rajonet më të prekura nga ngrohja globale dhe po përballet gjithnjë e më shpesh me temperatura rekord gjatë muajve të verës.
Të dhënat tregojnë se numri më i madh i vdekjeve të parakohshme të lidhura me nxehtësinë është regjistruar në Itali, e ndjekur nga Spanja, Gjermania dhe Greqia. Ndërkohë, Greqia ka shënuar normën më të lartë të vdekjeve për një milion banorë.
Ekspertët paralajmërojnë se rritja e temperaturave globale, urbanizimi i shpejtë dhe plakja e popullsisë po rrisin ekspozimin dhe ndjeshmërinë ndaj efekteve të të nxehtit, duke shtuar rrezikun për sëmundje dhe vdekje.
OBSH thekson se masat individuale, si shmangia e ekspozimit në diell gjatë orëve më të nxehta dhe mbajtja e ambienteve të freskëta, janë të rëndësishme, por nuk mjaftojnë për të përballuar një problem që kërkon ndërhyrje të koordinuara institucionale.
Për këtë arsye, organizata ka publikuar edicionin e dytë të udhëzuesit për planet e veprimit ndaj nxehtësisë, duke rekomanduar një sërë masash parandaluese për qeveritë dhe autoritetet lokale.
Ndër rekomandimet kryesore përfshihen shtimi i hapësirave të gjelbra në qytete për krijimin e zonave me hije, ngritja e qendrave të ftohjes për grupet e rrezikuara, monitorimi i personave të moshuar dhe edukimi i stafit arsimor për njohjen e shenjave të sëmundjeve të shkaktuara nga nxehtësia.
OBSH vlerëson se planet e mirëkoordinuara për mbrojtjen nga nxehtësia mund të shpëtojnë mijëra jetë dhe të zvogëlojnë ndikimin e valëve të të nxehtit në shëndetin publik.