Një ilaç i ri oral i grupit GLP-1 mund të ofrojë një alternativë të rëndësishme për personat me diabet të tipit 2 që nuk dëshirojnë ose kanë frikë nga injeksionet.
Sipas një studimi të ri të publikuar në revistën “The Lancet”, pilula eksperimentale elekoglipron ka treguar rezultate të konsiderueshme në uljen e sheqerit në gjak dhe humbjen e peshës trupore, shkruan burimi Medical News Today transmeton Gazeta Shneta.
Studimi klinik përfshiu persona me diabet të tipit 2, të cilët morën elekoglipron për 26 javë. Në fund të periudhës së studimit, pjesëmarrësit që përdorën ilaçin shfaqën ulje të ndjeshme të niveleve të glukozës në gjak krahasuar me grupin që mori placebo.
Shumë prej tyre arritën objektivin e rekomanduar të hemoglobinës së glikuar (HbA1c) prej 7%, një tregues kyç për kontrollin afatgjatë të diabetit.
Përveç kontrollit më të mirë të sheqerit në gjak, ilaçi ndikoi edhe në peshën trupore. Deri në 72.3% e pjesëmarrësve humbën të paktën 5% të peshës së tyre, një nivel që konsiderohet i rëndësishëm për përmirësimin e shëndetit metabolik dhe uljen e rrezikut kardiovaskular.
Ekspertët thonë se një alternativë në formë pilule mund të jetë veçanërisht e dobishme për pacientët që kanë frikë nga gjilpërat ose preferojnë trajtime më të lehta për t’u përdorur. Gjithashtu, pilulat mund të jenë më të lehta për transport dhe potencialisht më pak të kushtueshme për prodhim sesa versionet injektuese.
Megjithatë, studiuesit theksojnë se nevojiten prova më të mëdha klinike për të vlerësuar sigurinë afatgjatë të elekoglipronit dhe për të përcaktuar nëse ai ofron të njëjtat përfitime si ilaçet e tjera GLP-1, përfshirë mbrojtjen e zemrës dhe veshkave. /Gazeta Shneta/