Personat që vuajnë nga sëmundje autoimune dhe obezitet mund të kenë rrezik më të ulët për mpiksje të rrezikshme të gjakut, goditje në tru dhe vdekje nëse përdorin barna të grupit GLP-1, si Ozempic dhe Zepbound, sugjeron një studim i ri.
Hulumtimi, i publikuar në Journal of the American Heart Association, analizoi të dhënat shëndetësore të më shumë se 26 mijë pacientëve me sëmundje autoimune dhe obezitet, të trajtuar në një rrjet shëndetësor në Florida gjatë periudhës 2014–2024, shkruan Healthday transmeton Gazeta Shneta.
Studiuesit krahasuan mbi 13 mijë pacientë që përdornin barna GLP-1 me një grup të ngjashëm pacientësh që nuk i përdornin këto medikamente.
Rezultatet treguan se pacientët që merrnin barna GLP-1 kishin një 44 për qind rrezik më të ulët të vdekjes nga çdo shkak, krahasuar me ata që nuk përdornin këto terapi.
Po ashtu, përdoruesit e këtyre barnave kishin:
17 për qind më pak rrezik për mpiksje të gjakut në vena;
31 për qind më pak rrezik për emboli pulmonare;
13 për qind më pak rrezik për goditje në tru;
21 për qind më pak vizita urgjente në spital.
Sëmundjet autoimune, si artriti reumatoid, psoriaza, sëmundja celiake dhe vitiligo, lidhen me inflamacion kronik dhe çrregullime të sistemit imunitar, të cilat rrisin rrezikun për komplikime serioze kardiovaskulare.
Sipas autores kryesore të studimit, Dr. Amy Sheer nga Universiteti i Floridës, rezultatet tregojnë një lidhje të qëndrueshme mes përdorimit të barnave GLP-1 dhe uljes së komplikimeve serioze shëndetësore.
Ekspertët besojnë se përfitimet e këtyre medikamenteve nuk kufizohen vetëm në kontrollin e sheqerit në gjak dhe humbjen e peshës, por mund të lidhen edhe me aftësinë e tyre për të reduktuar inflamacionin dhe për të ndikuar në proceset e mpiksjes së gjakut.
“Ulja prej 44 për qind e vdekshmërisë është një gjetje që meriton vëmendje të veçantë”, tha Dr. Fatima Cody Stanford nga Massachusetts General Hospital, e cila shqyrtoi rezultatet e studimit.
Megjithatë, studiuesit theksojnë se nevojiten kërkime të mëtejshme për të kuptuar më mirë mekanizmat që qëndrojnë pas këtyre përfitimeve dhe për të përcaktuar se cilët pacientë mund të përfitojnë më shumë nga këto terapi.
Barnat GLP-1 janë zhvilluar fillimisht për trajtimin e diabetit të tipit 2, por vitet e fundit janë përdorur gjerësisht edhe për trajtimin e obezitetit, për shkak të efektit të tyre në uljen e oreksit dhe kontrollin e peshës trupore.