Shkencëtarët po e shqyrtojnë gjithnjë e më seriozisht përdorimin e litiumit në doza të ulëta si një trajtim potencial për sëmundjen e Alzhimerit, duke e zhvendosur fokusin nga përdorimi i tij tradicional në çrregullimin bipolar drejt neuroproteksionit dhe ngadalësimit të përkeqësimit të trurit.
Aktualisht, rreth 32 milionë njerëz në botë jetojnë me Alzheimer, ndërsa parashikimet tregojnë se kjo shifër mund të arrijë në 152 milionë deri në vitin 2050. Trajtimet ekzistuese janë të kufizuara dhe përdoren kryesisht në fazat e hershme për të ngadalësuar rënien njohëse ose për të menaxhuar simptomat, shkruan burimi Medical News Today transmeton Gazeta Shneta.
Studimi i ri, i publikuar në revistën “JAMA Psychiatry”, sugjeron se litiumi në doza të ulëta mund të ketë efekte neuroprotektive dhe të ndikojë në proceset e ashtuquajtura neuroprogresion, të cilat lidhen me dëmtimin gradual të trurit. Sipas studiuesve, ky mekanizëm përfshin faktorë si inflamacioni oksidativ, dëmtimi mitokondrial dhe humbja e lidhjeve sinaptike.
Ndryshe nga dozat standarde të litiumit të përdorura në çrregullimin bipolar, dozat e ulëta mund të jenë më të tolerueshme, veçanërisht tek të moshuarit, duke reduktuar rrezikun e efekteve anësore në veshka dhe tiroide.
Megjithatë, ekspertët theksojnë se këto gjetje janë ende paraprake dhe nuk nënkuptojnë një trajtim të miratuar. Nevojiten prova klinike më të gjera për të përcaktuar nëse litiumi mund të ngadalësojë realisht përparimin e Alzheimerit tek pacientët. /Gazeta Shneta/