Një numër i vogël videosh në TikTok që përhapin informacione të rreme rreth kremrave kundër diellit po arrijnë shumë më tepër ndërveprime sesa përmbajtjet e bazuara në fakte shkencore, sipas një studimi të ri të publikuar në revistën “PLOS Digital Health”.
Studiuesit nga Universiteti i Albertës në Kanada analizuan 971 videot më të shikuara që lidhen me kremrat kundër diellit në TikTok.
Ata zbuluan se shumica dërrmuese e videove – rreth 87 për qind – promovonin përdorimin e kremrave për mbrojtje nga rrezet e diellit.
Megjithatë, videot që përmbanin pretendime të pavërteta, si se kremrat janë toksikë ose se djegiet nga dielli nuk janë të rrezikshme, gjeneronin më shumë pëlqime, komente dhe shpërndarje.
Sipas studiuesve, përmbajtjet që sfidojnë këshillat tradicionale shëndetësore ose nxisin frikë kanë më shumë gjasa të tërheqin vëmendjen e përdoruesve në rrjetet sociale.
Kjo bën që edhe një numër i vogël videosh dezinformuese të kenë ndikim të madh në perceptimet e publikut.
Pretendimet më të shpeshta të identifikuara në këto video përfshinin pohime se kremrat kundër diellit shkaktojnë kancer, dëmtojnë hormonet, ndotin qumështin e gjirit ose përmbajnë substanca të rrezikshme.
Megjithatë, studiuesit theksuan se nuk ka prova shkencore që përbërësit e përdorur gjerësisht në kremrat kundër diellit paraqesin rrezik për shëndetin e njerëzve.
Ekspertët e dermatologjisë paralajmërojnë se dezinformatat e tilla mund të kenë pasoja serioze, pasi përdorimi i kremrave kundër diellit konsiderohet një nga mënyrat më efektive për të reduktuar rrezikun e kancerit të lëkurës dhe dëmtimeve të shkaktuara nga rrezet ultravjollcë.
Autorët e studimit theksojnë se sfida kryesore mbetet fakti që algoritmet e rrjeteve sociale shpesh favorizojnë përmbajtjet sensacionale dhe provokuese, duke bërë që informacionet e rreme të përhapen më shpejt sesa këshillat e bazuara në prova shkencore.
Ndërkohë, TikTok ka deklaruar se ndalon përmbajtjet që përhapin dezinformata shëndetësore dhe këshilla të pasakta mjekësore që mund t’i dekurajojnë njerëzit nga marrja e kujdesit të duhur shëndetësor.