Një sukses i rëndësishëm profesional vjen nga fusha e kirurgjisë maksillofaciale, ku kirurgu kosovar ka bërë të ditur se është ftuar të vazhdojë trajnimin e tij në një nga qendrat më të njohura evropiane për këtë specialitet.
Gjatë qëndrimit në Francë, ai pati privilegjin të takojë Prof. Bernard Devauchelle, një nga emrat më të shquar të kirurgjisë rekonstruktive moderne dhe kirurgun që udhëhoqi ekipin që realizoi transplantin e parë të suksesshëm të fytyrës në botë, së bashku me Prof. Sylvie Testelin, përcjell Gazeta Shneta.
Ky transplant, i kryer në vitin 2005, konsiderohet një moment historik që ndryshoi përgjithmonë zhvillimin e kirurgjisë rekonstruktive dhe transplantologjisë.
Kirurgu kosovar ka njoftuar gjithashtu se është ftuar të vazhdojë trajnimin profesional në Centre Hospitalier Universitaire d’Amiens-Picardie, në qytetin e Amiensit, një institucion me reputacion ndërkombëtar, i njohur për kontributin e tij në zhvillimin e teknikave të avancuara të kirurgjisë maksillofaciale dhe rekonstruktive.
Në një reagim publik, ai e cilësoi këtë përvojë si një nder të veçantë dhe një mundësi të jashtëzakonshme për zhvillimin e mëtejshëm profesional.
“Është një privilegj të takoj Prof. Bernard Devauchelle, një nga pionierët e kirurgjisë rekonstruktive moderne dhe kirurgun që udhëhoqi ekipin e transplantit të parë të suksesshëm të fytyrës në botë, së bashku me Prof. Sylvie Testelin. Ndihem i nderuar që jam ftuar të vazhdoj trajnimin tim profesional në Centre Hospitalier Universitaire d’Amiens-Picardie, në Amiens, aty ku u shkrua një nga kapitujt më të rëndësishëm të historisë së Kirurgjisë Maksillofaciale”, ka deklaruar ai.
Ky trajnim pritet t’i mundësojë kirurgut zgjerimin e ekspertizës në teknikat më bashkëkohore të kirurgjisë maksillofaciale dhe rekonstruktive, njohuri që në të ardhmen mund të kontribuojnë edhe në avancimin e shërbimeve shëndetësore në Kosovë. /Gazeta Shneta/