Shërbimi Kombëtar Shëndetësor i Britanisë (NHS) ka nisur ofrimin e ilaçit teplizumab, trajtimi i parë në botë që mund të vonojë shfaqjen klinike të diabetit të tipit 1 tek personat me rrezik shumë të lartë për zhvillimin e sëmundjes.
Ilaçi është një terapi imunologjike që vepron duke modifikuar përkohësisht aktivitetin e sistemit imunitar. Në diabetin e tipit 1, sistemi imunitar sulmon gabimisht qelizat beta të pankreasit që prodhojnë insulinë, shkruan BBC, transmeton Gazeta Shneta.
Teplizumab ndihmon në ngadalësimin e këtij procesi, duke ruajtur funksionin e këtyre qelizave për një periudhë më të gjatë.
Sipas të dhënave të studimeve klinike, trajtimi mund të shtyjë shfaqjen e diabetit të tipit 1 mesatarisht me rreth dy deri në tre vjet, ndërsa tek disa pacientë efekti zgjat edhe më shumë.
Kjo do të thotë se personat e trajtuar mund të jetojnë më gjatë pa pasur nevojë për injeksione të përditshme me insulinë dhe pa u përballur me komplikacionet që shoqërojnë fillimin e sëmundjes.
Në fazën fillestare, trajtimi do t’u ofrohet personave që identifikohen si me rrezik të lartë pas testeve të specializuara, përfshirë të afërmit e pacientëve me diabet të tipit 1 që kanë shenja të hershme të procesit autoimun.
Ekspertët e NHS e konsiderojnë këtë një ndryshim të rëndësishëm në mënyrën se si trajtohet diabeti i tipit 1, pasi për herë të parë synohet vonimi i sëmundjes përpara se ajo të shfaqet plotësisht, dhe jo vetëm menaxhimi i saj pas diagnozës. /Gazeta Shneta/