Pirja e kafesë mund të lidhet me një rrezik më të ulët për zhvillimin e sëmundjeve serioze të mëlçisë, përfshirë cirrozën dhe kancerin e mëlçisë, sugjeron një studim i ri i publikuar në revistën “Clinical Gastroenterology and Hepatology”.
Studiuesit nga Cedars-Sinai Health Sciences University analizuan të dhënat e 354,957 të rriturve, të ndjekur për një periudhë mesatare prej 13 vitesh.
Gjatë studimit, ata krahasuan gjendjen shëndetësore të personave që konsumonin kafe me ata që nuk e konsumonin.
Rezultatet treguan se personat që pinin pesë ose më shumë filxhanë kafe në ditë kishin 32% më pak rrezik për cirrozë, 47% më pak rrezik për kancer të mëlçisë dhe 42% më pak rrezik për vdekje të lidhur me sëmundjet e mëlçisë, krahasuar me ata që nuk pinin fare kafe.
Studiuesit vunë re se përfitime kishte edhe te personat që konsumonin një deri në dy filxhanë në ditë, ndërsa efektet më të mira u panë te ata që pinin tre deri në katër filxhanë.
Megjithatë, ata nuk rekomandojnë rritjen e konsumit në pesë ose më shumë filxhanë vetëm për të mbrojtur mëlçinë.
Skanimet me rezonancë magnetike treguan se konsumuesit e kafesë kishin më pak yndyrë, inflamacion dhe dëmtime fibroze në mëlçi. Po ashtu, analizat e gjakut zbuluan nivele më të larta të proteinave që lidhen me funksionimin e shëndetshëm të mëlçisë dhe më të ulëta të proteinave të lidhura me inflamacionin dhe dëmtimin e saj.
Një tjetër gjetje e rëndësishme ishte se efektet mbrojtëse u vunë re si te konsumuesit e kafesë me kafeinë, ashtu edhe te ata që pinin kafe pa kafeinë, duke sugjeruar se përfitimet nuk lidhen vetëm me kafeinën, por edhe me përbërës të tjerë natyralë të kafesë.
Autorët theksojnë se studimi është vëzhgues dhe nuk provon se kafja parandalon drejtpërdrejt sëmundjet e mëlçisë. Ata rekomandojnë që mbrojtja e mëlçisë të vazhdojë të bazohet në mbajtjen e një peshe të shëndetshme, kufizimin e alkoolit, aktivitetin fizik dhe kontrollin e sheqerit, tensionit të gjakut dhe kolesterolit./Gazeta Shneta/