Të përzierat e rënda gjatë shtatzënisë mund të rrisin rrezikun për komplikime serioze si për nënën ashtu edhe për foshnjën, sipas një studimi të ri amerikan.
Gjendja e njohur si hiperemeza gravidarum (HG), e cila karakterizohet nga të përziera dhe të vjella të vazhdueshme e të rënda gjatë shtatzënisë, prek rreth 1% deri në 3% të shtatzënive. Ndryshe nga të përzierat e zakonshme të mëngjesit, të cilat prekin deri në 80% të grave shtatzëna, HG mund të shkaktojë dehidratim, humbje të konsiderueshme në peshë dhe mungesë të lëndëve ushqyese, shkruan burimi Health Day transmeton Gazeta Shneta.
Studimi, i publikuar në revistën “American Journal of Epidemiology”, analizoi pothuajse 2.5 milionë lindje të një bebeje në Kaliforni gjatë viteve 2007–2011. Rreth 2% e grave kishin kërkuar trajtim në urgjencë ose ishin shtruar në spital për shkak të hiperemezës gravidarum.
Rezultatet treguan se gratë me HG kishin rrezik më të lartë për disa komplikime të shtatzënisë, përfshirë:
– 18% rrezik më të lartë për preeklampsi;
– 25% rrezik më të lartë për lindje të parakohshme;
– 37% rrezik më të lartë për anemi;
– 14% rrezik më të lartë për shkëputje të placentës, një gjendje ku placenta ndahet pjesërisht ose plotësisht nga muri i mitrës.
“Gjetëm se hiperemeza gravidarum lidhej me rrezik më të lartë për lindje të parakohshme, anemi, foshnja më të vogla se sa pritej, preeklampsi, hipertension gestacional dhe shkëputje të placentës”, tha Rebecca Gardner, autore kryesore e studimit nga Universiteti Stanford.
Sipas studiuesve, gratë me HG mund të kenë vështirësi në konsumimin e ushqimit, marrjen e lëngjeve dhe sigurimin e ushqyesve të nevojshëm për veten dhe zhvillimin e fetusit.
Mungesa e ushqyesve mund të ndikojë në zhvillimin e placentës, çka mund të shpjegojë lidhjen me komplikime si preeklampsia dhe lindja e foshnjave me peshë më të ulët.
Studimi zbuloi gjithashtu se gratë e shtruara në spital për HG gjatë tremujorit të dytë kishin më shumë gjasa të përjetonin komplikime krahasuar me ato të trajtuara gjatë tremujorit të parë. /Gazeta Shneta/