Një studim i ri sugjeron se trajnimi me ndërfaqe tru-kompjuter (Brain-Computer Interface, BCI) mund ta ndihmojë trurin të dallojë më shpejt edhe gabimet më të vogla gjatë lëvizjeve, një zbulim që mund të ketë rëndësi për rehabilitimin, kirurgjinë dhe parandalimin e rrëzimeve te të moshuarit.
Studiuesit zbuluan se truri mund të mësojë të identifikojë më mirë devijimet e vogla gjatë lëvizjes kur merr reagime të drejtpërdrejta nga aktiviteti i tij elektrik. Gjetjet u publikuan në revistën shkencore Advanced Science.
Në studim morën pjesë vullnetarë të cilët përdorën një levë (joystick) për të lëvizur një kursor drejt një objektivi në ekran. Gjatë disa provave, studiuesit ndryshuan në mënyrë të padukshme trajektoren e kursorit për të krijuar gabime të vogla vizuo-motorike. Një grup pjesëmarrësish mori reagime të zakonshme mbi performancën, ndërsa grupi tjetër mori reagime të bazuara në sinjalet elektrike të trurit të regjistruara me elektroencefalogram (EEG). Trajnimi u zhvillua për pesë ditë rresht.
Rezultatet treguan se pjesëmarrësit që u trajnuan me teknologjinë BCI përmirësuan dukshëm aftësinë për të dalluar edhe gabimet më të vogla të lëvizjes. Në të njëjtën kohë, u vu re një rritje e sinjalit të trurit të njohur si “error positivity” (Pe), i cili lidhet me ndërgjegjësimin për gabimet.
Sipas autorëve, ndërsa trajnimi tradicional ndihmoi kryesisht në dallimin e gabimeve më të mëdha, trajnimi me ndërfaqe tru-kompjuter përshpejtoi procesin e të mësuarit dhe rriti ndjeshmërinë ndaj devijimeve shumë të vogla.
Studiuesit vlerësojnë se kjo qasje mund të përdoret në të ardhmen për të përmirësuar rehabilitimin pas dëmtimeve neurologjike, për të rritur saktësinë e lëvizjeve në profesione që kërkojnë precizion të lartë, si kirurgjia, si dhe për të ndihmuar në uljen e rrezikut të rrëzimeve te personat e moshuar.
Megjithatë, ata theksojnë se nevojiten studime të mëtejshme për të vlerësuar efektet afatgjata dhe zbatimin e kësaj teknologjie në praktikën klinike.