Pacientët që përdorin opioide për trajtimin e dhimbjeve kronike kanë më shumë gjasa ta ulin me sukses dozën e barnave kur procesi zhvillohet gradualisht dhe në bashkëpunim me mjekun.
Ky është përfundimi i një studimi të ri të publikuar në revistën shkencore Annals of Internal Medicine.
Studimi, i udhëhequr nga studiues të Universitetit Stanford, përfshiu më shumë se 500 të rritur që kishin vuajtur nga dhimbje kronike për të paktën gjashtë muaj dhe kishin përdorur barna opioide për të paktën tre muaj. Asnjë prej pjesëmarrësve nuk kishte varësi nga këto medikamente.
Mesatarisht, pjesëmarrësit kishin përdorur opioide për 12.4 vjet dhe shumica shprehën dëshirën për të ulur dozën e tyre.
Në kuadër të studimit, pacientët punuan së bashku me mjekët për të gjetur dozën më të ulët që u mundësonte të kontrollonin dhimbjen. Doza u ul gradualisht, me jo më shumë se 10 për qind në muaj, ndërsa pacientët kishin mundësi ta ndalonin përkohësisht procesin sa herë që e konsideronin të nevojshme, në konsultim me mjekun.
Pas një viti, rreth gjysma e pjesëmarrësve arritën të përgjysmonin dozën e opioideve pa përkeqësim të dhimbjes, ose ta mbanin dozën më të ulët duke raportuar më pak dhimbje.
Autorja kryesore e studimit, Beth Darnall, profesoreshë e anesteziologjisë dhe mjekësisë së dhimbjes në Universitetin Stanford, tha se procesi duhet të jetë i përqendruar te pacienti.
“Për pacientët, këto të dhëna janë inkurajuese. Nëse ulja e opioideve bëhet në mënyrën e duhur, me një qasje të përqendruar te pacienti, është e mundur të reduktohet ndjeshëm doza pa shtuar dhimbjen në afatgjatë,” tha Darnall.
Sipas saj, një nga arsyet kryesore pse pacientët i druhen uljes së dozës është frika se do të humbin kontrollin mbi trajtimin.
“Ne u përqendruam te secili pacient dhe zhvilluam metoda që t’i jepnin atij kontroll maksimal gjatë gjithë procesit,” shtoi ajo.
Studiuesit theksojnë se gjetjet janë në përputhje me udhëzimet më të fundit të Qendrave Amerikane për Kontrollin dhe Parandalimin e Sëmundjeve (CDC), të cilat rekomandojnë që ulja e dozës së opioideve për dhimbjet kronike të bëhet gradualisht dhe në bashkëpunim me pacientin.
Ata kujtojnë se në të kaluarën shumë pacientëve u është ndërprerë trajtimi në mënyrë të menjëhershme ose shumë të shpejtë, gjë që ka çuar në simptoma të rënda të tërheqjes, rritje të rrezikut për përdorimin e drogave të paligjshme dhe, në disa raste, edhe në pasoja fatale.
“Në përpjekje për të ulur rrezikun, në fakt krijuam rreziqe të reja duke i ulur opioidet në mënyrën e gabuar,” tha Darnall.
Autorët theksojnë se rezultatet nuk vlejnë për personat që kanë zhvilluar varësi nga opioidet, pasi studimi përfshiu vetëm pacientë që i përdornin këto barna për trajtimin e dhimbjeve kronike pa shenja të varësisë.
Sipas studiuesve, gjetjet mund të ndihmojnë pacientët dhe mjekët të planifikojnë një proces më të sigurt dhe më të suksesshëm të uljes së dozës së opioideve, duke shmangur ndërprerjen e menjëhershme të trajtimit.