Pirja e kefirit para gjumit nuk ofron përfitime shtesë për shëndetin e zorrëve krahasuar me konsumimin e tij në periudha të tjera të ditës. Megjithëse në rrjetet sociale, veçanërisht në TikTok, pretendohet se kefiri i pirë në mbrëmje ul fryrjen dhe shqetësimet gastrointestinale në mëngjes, ekspertët theksojnë se nuk ka prova shkencore që ta mbështesin këtë ide.
Sipas Marie-Pierre St-Onge, profesoreshë e asociuar e mjekësisë ushqyese në Universitetin Columbia, qëllimi kryesor i kefirit është futja e baktereve të dobishme në organizëm, të cilat përmirësojnë shëndetin e zorrëve dhe atë të përgjithshëm. “Kefiri mund të konsumohet në çdo moment të ditës që i përshtatet më mirë rutinës ushqimore të individit”, shpjegon ajo.
Sipas burimit Very Well Health, kefiri është një produkt qumështi i fermentuar, i pasur me probiotikë, madje shpesh përmban më shumë se kosi. Mes tjerash, ndihmon tretjen, forcon kockat, rregullon sheqerin në gjak dhe mund të ulë inflamacionin e traktit tretës dhe diarrenë. Gjithashtu, është burim i mirë proteinash dhe mund të ndihmojë në ndjenjën e ngopjes dhe menaxhimin e peshës trupore.
Sa i përket gjumit, disa studime po shqyrtojnë lidhjen e mundshme mes kefirit dhe rregullimit të ciklit të gjumit, përmes ndikimit në melatoninë ose kortizol. Megjithatë, deri më tani nuk ka të dhëna cilësore që tregojnë se konsumimi i kefirit në mbrëmje përmirëson gjumin.
Në përgjithësi, koha e konsumimit të kefirit nuk ka rëndësi për shëndetin e zorrëve. Megjithatë, personat që vuajnë nga refluksi gastroezofageal duhet të shmangin ushqimin para gjumit. Po ashtu, individët me sistem imunitar të dobësuar këshillohen të konsultohen me mjekun përpara se të konsumojnë kefir. /Gazeta Shneta/