Pudingu me fara chia përgatitet duke përzier farat chia me një lëng, si qumësht ose kos. Përfitimet e tij vijnë nga profili i pasur ushqyes: proteina, acide yndyrore omega-3, fibra, antioksidantë dhe përbërës bioaktivë. Konsumimi i tij çdo mëngjes mund të sjellë disa efekte pozitive në shëndet.
Së pari, përmirëson tretjen. Farat chia janë të pasura me fibra të tretshme dhe të patretshme, të cilat ndihmojnë formimin dhe lëvizjen e jashtëqitjes në traktin tretës. Kjo kontribuon në rregullsi të zorrëve dhe tretje më të shëndetshme, shkruan Very Well Health transmeton Gazeta Shneta.
Së dyti, mund të ndihmojë në uljen e sheqerit në gjak pas vakteve. Konsumimi i farave chia 30–60 minuta pas ushqimit është lidhur me nivele më të ulëta të glukozës, veçanërisht te personat me prediabet ose diabet të tipit 2, edhe pse studimet afatgjata japin rezultate të përziera.
Farat chia mbështesin edhe shëndetin e kockave, pasi janë një burim i shkëlqyer bimor i kalciumit. Një sasi e vogël mund të sigurojë një pjesë të konsiderueshme të nevojave ditore, duke ndihmuar densitetin mineral të kockave.
Gjithashtu, ato mund të ulin tensionin e gjakut falë fibrave, mineraleve si magnezi e kaliumi dhe antioksidantëve që reduktojnë inflamacionin. Konsumimi i rregullt është shoqëruar me ulje të ndjeshme të presionit sistolik dhe diastolik.
Pudingu me fara chia rrit ndjenjën e ngopjes, gjë që mund të ndihmojë në kontrollin e oreksit dhe, potencialisht, në zvogëlimin e perimetrit të belit. Dhe ndikon pozitivisht edhe në profilin e kolesterolit, duke ulur LDL-në dhe trigliceridet, ndërsa rrit HDL-në. Së fundi, falë omega-3-ve, farat chia ndihmojnë në uljen e inflamacionit, duke mbështetur shëndetin e zemrës. /Gazeta Shneta/