Evolucioni i inteligjencës artificiale (AI) po e bën teknologjinë gjithnjë e më të pranishme në jetën e përditshme. Së fundmi, ajo po hyn fuqishëm edhe në fushën e fitnesit, duke ngritur pyetjen nëse aplikacionet e bazuara në AI mund të zëvendësojnë trajnerët personalë në palestër.
Një shembull i tillë është aplikacioni “Fitness AI”, i zhvilluar nga kompania “APPEX”, i cili synon t’u ofrojë përdoruesve stërvitje të strukturuara dhe të personalizuara përmes algoritmeve inteligjente, shkruan burimi Health News transmeton Gazeta Shneta.
Megjithatë, ekspertët theksojnë se trajnerët personalë ofrojnë më shumë sesa thjesht plane ushtrimesh.
Një studim i Institutit Federal të Shkencave Sportive, i vitit 2022 thekson se trajnerët nuk mund të zëvendësohen plotësisht, pasi ata sjellin përvojë profesionale dhe vlerësim njerëzor.
Sipas Qendrave Amerikane për Kontrollin dhe Parandalimin e Sëmundjeve (CDC), vetëm një në katër të rritur në SHBA i përmbush rekomandimet për aktivitet fizik.
Aplikacione si “Fitness AI”, synojnë të ndihmojnë individët të qëndrojnë aktivë përmes planeve ditore të personalizuara.
Pas plotësimit të një pyetësori fillestar, aplikacioni përcakton qëllime si humbja e peshës, ndërtimi i muskujve apo përmirësimi i gjendjes fizike, duke marrë parasysh nivelin e aktivitetit, pajisjet në dispozicion dhe të dhënat trupore.
Trajneri i pavarur Michael Coley, thekson se AI mund të jetë e dobishme për persona pa lëndime dhe me qëllime të qarta, por motivimi dhe korrektimi i formës së ushtrimeve mbeten avantazhe të rëndësishme të trajnerëve njerëzorë.
Ndërkohë, “APPEX”, po punon për të përmirësuar lidhjen emocionale të aplikacionit me përdoruesit dhe për të shtuar veçori të reja, si skanimi i trupit, duke e bërë AI gjithnjë e më të avancuar në botën e fitnesit. /Gazeta Shneta/