Afro 100 infermierë që punojnë në Klinika të ndryshme në QKUK, ku trajtohen rastet me COVID-19, nuk po i marrin pagesat e ndërrimeve të natës, ndonëse ata po detyrohen t’i mbajnë ndërrimin.
Pagesat nuk i kanë marrë as për shtesat që janë ndarë nga Qeveria e Kosovës. Në vendimin e Qeverisë së kaluar, ishte marrë vendim që mjekët t’i marrin 250 Euro në muaj, stafi i infermierëve 150 Euro, kurse personeli mbështetës 100 Euro.
E në këtë kategori, nuk kanë hyrë infermierët që janë pranuar si staf ndihmës nga Ministria e Shëndetësisë, për kujdesin e pacienteve me koronavirus.
Në kushte anonimiteti, infermierë të Klinikave të ndryshme ku punojnë ata, thonë për Gazetën Online “Reporteri.net”, se që nga fillimi i punës, që gati pesë muaj, nuk kanë marrë asnjë shtesë me para për ndërrimet e natës e as për orët shtesë.
Se pagesat nuk i kanë marrë asnjëherë, e kanë konfirmuar edhe Ministria e Shëndetësisë, ndonëse fajin ia lënë Qeverisë së kaluar.
Në një përgjigje për Reporteri.net, ky institucion thotë se për muajin shkurt dhe mars, janë duke shqyrtuar mundësinë e pagesës së tyre për këta dy muaj.
“Me vendimet e mëhershme të Qeverisë së kaluar për shtesat në pagë, në asnjërin prej tyre nuk ka qenë e paraparë kjo kategori që të përfshihet në këto shtesa në pagë. Me vendimin e Qeverisë, të muajit shkurt, që parasheh shtesa në pagë vetëm për shkurt dhe mars 2021, MSh është duke shqyrtuar mundësinë e pagesës së tyre për këta dy muaj”, thuhet në përgjigjën e MSh-së. /Reporteri.net/