Agjencia shëndetësore e BE-së: Varianti Omicron paraqet rrezik të lartë për Evropën

2021-11-28 në ora 01:00

Varianti i ri COVID, i quajtur Omicron dhe i zbuluar fillimisht në Afrikën e Jugut, paraqet një rrezik të lartë për Evropën, paralajmëroi të premten, agjencia shëndetësore e BE-së.

Qendra Evropiane për Parandalimin dhe Kontrollin e Sëmundjeve (ECDC), vuri në dukje në një raport të vlerësimit të kërcënimit se kishte ende “pasiguri të konsiderueshme në lidhje me transmetueshmërinë, efektivitetin e vaksinës, rrezikun për riinfeksione dhe vetitë e tjera të variantit Omicron”, shkruan MedicalxPress përcjell Gazeta Shneta.

Megjithatë, rreziku i përgjithshëm që Omicron paraqet për Bashkimin Evropian dhe Zonën Ekonomike Evropiane (Islanda, Lihtenshtajni dhe Norvegjia) ishte “shumë më i lartë”.

“Në një situatë ku varianti Delta po ringjallet në BE/ZEE, ndikimi i futjes dhe përhapjes së mundshme të mëtejshme të Omicron mund të jetë shumë i lartë,” shtuan ata.

Përveç Afrikës së Jugut, Omicron është zbuluar në Izrael në një person që vinte nga Malavi, si dhe në Botsvanë, Hong Kong si dhe Belgjikë, anëtares së BE-së.

Agjencia u bëri thirrje vendeve që të kryejnë sekuencën gjenomike dhe gjurmimin e kontakteve të rasteve të konfirmuara dhe u bëri thirrje njerëzve që të mos udhëtojnë në zonat e prekura.

Organizata Botërore e Shëndetësisë, deklaroi të premten llojin e zbuluar së fundmi si një variant shqetësues.

Ky klasifikim e vendos Omicron në kategorinë më shqetësuese të varianteve të COVID-19, së bashku me Delta dominuese globalisht, plus rivalët e tij më të dobët Alfa, Beta dhe Gama. /Gazeta Shneta/