Një studim i ri ka zbuluar se përdorimi i medikamenteve antidepresive mund të lidhet me një rrezik të shtuar për vdekje të papritur nga zemra (SCD).
Kërkimi, i prezantuar në kongresin shkencor të Shoqatës Europiane të Kardiologjisë, ka treguar se sa më gjatë të jetë periudha e përdorimit të antidepresantëve, aq më i lartë është rreziku për SCD.
Studimi, që shqyrtoi të dhënat e vdekjeve në Danimarkë në vitin 2010, tregoi se individët që kishin përdorur antidepresantë për një deri në pesë vjet kishin një rrezik 56% më të lartë të vdekjes së papritur.
Ata që ishin ekspozuar për gjashtë vjet ose më shumë kishin një rrezik 2.2 herë më të lartë. Rreziku ishte më i theksuar te ata në moshat 30-59 vjeç, ndërsa për individët më të rinj (18-29 vjeç), lidhja mes përdorimit të antidepresantëve dhe vdekjes së papritur nuk ishte statistikisht e rëndësishme, transmeton
Gazeta Shneta.
Ekspertët sugjerojnë se ky rrezik mund të jetë i lidhur me efektet anësore të medikamenteve antidepresive, por gjithashtu mund të pasqyrojë probleme të tjera shëndetësore të pacientëve, si dhe faktorë të jashtëm si zakonet e jetesës dhe kërkesa e vonuar për ndihmë mjekësore. Studiuesit theksuan se janë të nevojshme kërkime të mëtejshme për të kuptuar plotësisht ndikimin e përdorimit të këtyre medikamenteve mbi shëndetin e zemrës./GazetaShneta/