Nënat kanë ditur prej kohësh për përfitimet e shumta të qumështit të gjirit. Tani, një studim global konfirmon se antitrupat e kaluar përmes qumështit të gjirit tek foshnjat mund të mbrojnë me të vërtetë kundër sëmundjeve.
Antitrupat e sistemit imunitar kundër një infeksioni të zakonshëm, rotavirusit, ishin veçanërisht mbrojtës, tha një ekip nga Universiteti i Rochester në Nju Jork shkruan burimi Health Day përcjell Gazeta Shneta.
“Ishte inkurajuese të shihje një lidhje kaq të qartë midis niveleve më të larta të antitrupave dhe një vonese ndaj infeksionit rotavirus,” tha autori kryesor i studimit, Dr. Kirsi Jarvinen-Seppo, një profesor i alergjisë dhe imunologjisë në Spitalin e Fëmijëve Golisano.
Studimi i ri u financua nga Fondacioni Bill dhe Melinda Gates dhe u botua së fundmi në “Journal of Clinical Investigation”.
Hulumtimi përfshiu analizën e mostrave të qumështit të gjirit nga 695 gra në Finlandë, Shtetet e Bashkuara, Pakistan, Peru dhe Bangladesh.
Studimi zbuloi se qumështi i gjirit nga nënat që përmbante nivele të larta të antitrupave të sistemit imunitar IgA dhe IgG duket i lidhur me aftësinë e foshnjës për t’u mbrojtur nga rotavirusi, i cili mund të shkaktojë diarre të rëndë dhe ndonjëherë kërcënuese për jetën.
Nënat që jetonin në vendet me të ardhura më të ulëta zakonisht kishin nivele edhe më të larta të antitrupave mbrojtës në qumështin e tyre të gjirit krahasuar me gratë nga vendet më të pasura, vunë në dukje studiuesit.
Kjo ishte veçanërisht e vërtetë për antitrupat kundër mikrobeve që shkaktojnë shigella dhe pneumokokun, dy shkaqe kryesore të sëmundjes dhe vdekjes së foshnjave dhe fëmijëve në vendet e varfra.
Kishte një gjetje të papritur: Gratë që ishin mbipeshë ose obeze prireshin të kishin nivele më të ulëta të antitrupave mbrojtës në qumështin e gjirit, krahasuar me gratë me peshë normale. Kjo ishte kundërintuitive, tha Dr. Jarvinen-Seppo.
“Ne kishim parashikuar që nënat nën peshë mund të kishin nivele më të ulëta të antitrupave për shkak të statusit më të dobët të ushqyerjes,” tha ajo. “Për shkak të rritjes së normave të obezitetit në mbarë botën, ky mund të jetë një zbulim domethënës, por është paraprak dhe nevojiten kërkime shtesë pasi kjo është hera e parë që analizohet”. /Gazeta Shneta/