Një studim i ri sugjeron se konsumimi i përditshëm i një avokadoje dhe një filxhani mangoje mund të përmirësojë shëndetin kardiovaskular.
Studiuesit zbuluan se kombinimi i këtyre dy frutave ndihmon në përmirësimin e funksionit të enëve të gjakut, veçanërisht aftësinë e tyre për t’u zgjeruar si përgjigje ndaj rrjedhjes së gjakut, një tregues i rëndësishëm për shëndetin e zemrës, shkruan burimi Very Well Health transmeton Gazeta Shneta.
Studimi i publikuar në “Journal of the American Heart Association”, përfshiu të rritur me pre-diabet që ndoqën këtë regjim për tetë javë.
Rezultatet treguan një përmirësim të lehtë në funksionin endotelial.
Konkretisht, pjesëmarrësit shfaqën një rritje prej rreth 1% në zgjerimin e ndërmjetësuar nga rrjedha e gjakut, që lidhet me një ulje deri në 8% të rrezikut kardiovaskular.
Avokado dhe mango janë të pasura me fibra, kalium, vitaminë C, fitokimikate dhe yndyra të shëndetshme. Këto përbërës ndihmojnë në uljen e stresit oksidativ, përmirësimin e funksionit të enëve të gjakut dhe rritjen e prodhimit të oksidit nitrik, i cili ndihmon në relaksimin dhe zgjerimin e tyre.
Studiuesit theksojnë se kombinimi i këtyre ushqimeve mund të ketë një efekt sinergjik, duke ofruar përfitime më të mëdha sesa konsumimi i secilit veçmas.
Megjithatë, studimi ka kufizime, përfshirë numrin e vogël të pjesëmarrësve dhe financimin nga organizata të industrisë ushqimore.
Ekspertët këshillojnë kujdes për personat me sëmundje të veshkave ose që marrin ilaçe për tensionin, për shkak të përmbajtjes së lartë të kaliumit.
Për pjesën tjetër, përfshirja e këtyre frutave në dietë mund të jetë një mënyrë e thjeshtë për të mbështetur shëndetin e zemrës. /Gazeta Shneta/