Elidona Bytyqi, mbesa e drejtorit të financave në QKUK Sherif Bytyqi, është transferuar nga Intensiva në Klinikën e Oftalmologjisë me leje të drejtorit të SHSKUK-së Elvir Azizi.
Flora Goxhufi është infermiere në njësinë e Intensives Qendrore pranë Klinikës së Anestezionit në QKUK. Goxhufi kujdeset për pacientët në koma tash e 23 vjet pa e ndërruar asnjëherë vendin e punës, shkruan Gazeta Shneta.
“Unë punoj që 23 vjet në Intensivë. Kam bo kërkesë për transfer ma herët por më kanë lejuar vetëm në njësi të njëjtë intensive. Puna në intensivë është e rëndë. Mu nuk më është leju transferi në ndonjë njësi me punë më të lehtë”, thotë ajo.
Goxhufi dhe kolegët e saj me përvojë të gjatë në intensivë janë revoltuar për shkak të një transferi që ka ndodhur javën e kaluar. Një kolege e tyre e cila u pranua në punë vetëm para një viti, u transferua nga Intensiva në Klinikën e Oftalmologjisë.
“Kushdo që transferohet e ka dikë të fortë që ia kryen punën. Krejt këto bëhen në mënyrë të parregullt”, ka thënë Goxhufi.
Infermierja e cila u transferua është Elidona Bytyqi. Ajo është mbesa e drejtorit të Financave në Qendrën Klinike Universitare, Sherif Bytyqi. Transferi u lejua me miratim nga drejtori i SHSKUK-së Elvir Azizi.
Nga zyra e tij nuk kanë dhënë shumë sqarime veçse kanë përmendur se transferet e stafit brenda institucionit janë të lejueshme.
“Transferet dhe lëvizjet e stafit brenda institucioneve janë të lejueshme, konform legjislacionit në fuqi, bazuar në kërkesat, nevojat dhe arsyeshmërinë e tyre”, thuhet në këtë përgjigje.
Transferin e ka konfirmuar edhe vet Bytyqi duke thënë se axha i saj nuk ka ndikuar në këtë vendim.
“Po, jam transferuar sipas kërkesës dhe arsyshmerisë të argumentuar. Nuk më është ofruar kurrfarë ndihmë e as nga agja im e as nga askush, pasi për këtë nuk kam pas asnjë nevojë, sepse është e drejte e ime dhe mendoj e pa tjetërsushme parashtrimi i një kërkesë, siç edhe e kam bërë”, ka thënë infermierja Bytyqi.
Ndikimin e ka mohuar edhe drejtori i Financave Sherif Bytyqi. “Te nderuar, jo kurfar ndikimi nuk kam pasur lidhur me kete transfer”, ka deklaruar Bytyqi në një përgjigje për Gazetën.
E gjithë kjo ka ndodhur pa dijeninë e drejtorit të Klinikës së Anestezionit dhe Mjekimit Intensiv, Gazmend Spahija. Ky i fundit në një përgjigje për Gazetën ka thënë se gjendet në pushim vjetor dhe nuk është i informuar për këtë transfer.
“Meqense gjindem ne pushim vjetor nuk kam informata per pyetjet tuaja. Ju lutem ti referoheni zyres per informim te QKUK-se”, ka deklaruar Sphaija. /Gazeta Shneta/