Personat që përdorin barna për humbje peshe si agonistët GLP-1 mund të humbin kilogramë, por përfitimet për shëndetin e zemrës janë dukshëm më të mëdha kur trajtimi kombinohet me aktivitet fizik të rregullt.
Ky është përfundimi i një studimi të ri të udhëhequr nga studiuesit e Universitetit të Kopenhagës.
Sipas studiuesve, ushtrimet fizike luajnë një rol kyç në përmirësimin e funksionit të enëve të gjakut dhe në uljen e inflamacionit, dy faktorë që lidhen ngushtë me rrezikun për sëmundje kardiovaskulare.
Edhe pse barnat ndihmojnë në ruajtjen e humbjes së peshës, ato nuk i zëvendësojnë përfitimet që sjell aktiviteti fizik për zemrën.
Studimi përfshiu 130 të rritur me obezitet të rëndë, të cilët fillimisht ndoqën një dietë me shumë pak kalori për tetë javë dhe humbën mesatarisht rreth 13.5 kilogramë.
Pas kësaj, pjesëmarrësit u ndoqën për një vit, gjatë të cilit një grup ushtroi rregullisht, një grup mori barna për humbje peshe, një grup kombinoi të dyja, ndërsa grupi i katërt nuk ndoqi asnjërën nga këto ndërhyrje.
Rezultatet treguan se pjesëmarrësit që ushtronin, pavarësisht nëse përdornin ose jo barna për humbje peshe, kishin funksion më të mirë të enëve të gjakut dhe nivele më të ulëta të inflamacionit krahasuar me ata që mbështeteshin vetëm te medikamentet.