Bordi Drejtues i SHSKUK-së sot ka marr vendim për angazhimin e një eksperti të jashtëm për administratë dhe çështje juridike ose ligjore.
Bordi Drejtues i Shërbimit Spitalor Klinik dhe Universitar i Kosovës ka marr sot vendim për angazhimin e një eksperti i cili do ta asistojë këtë organ drejtues për çështje të administratës dhe ligjit. Ky ekspert do të paguhet nga SHSKUK, shkruan Gazeta Shneta.
Vendimi i Bordit ka ardhur me propozimin e kryesuesit Naim Bardiqi. Propozimi i tij fillimisht është vënë në diskutim nëse është i drejt apo jo nga anëtari Besim Demolli.
“Për më me bind mendoj që është më mirë të kërkojmë një mendim nga zyra ligjore nëse jemi duke bërë diçka të drejt apo jo”, ka thënë Demolli, megjithëse ndërroi mendje kur u hodh në votim.
Por Bardiqi ka thënë se do ta riformulojë propozimin duke u shprehur se nëse ky propozim nuk do të ishte në përputhje me ligjin, atëherë do të kthehej nga administrata e SHSKUK-së.
Edhe anëtari Dren Boshnjaku ka ngritur pyetje nëse SHSKUK ka apo nuk ka kapacitete që do të mund të shfrytëzoheshin në vend të ekspertit. Por drejtori Elvir Azizi ka thënë se SHSKUK ka nevojë për ekspertë për të ndihmuar reformën.
Edhe anëtarja Vjollca Kadolli ka thënë se angazhimi i tij duhet të jetë në përputhje me ligjin meqë në bordin e kaluar eksperti ishte tërhequr me arsyetimin se angazhimi i tij nuk ishte në kuadër të ligjit.
Bardiqi ka konfirmuar gjatë mbledhjes së eksperti do të paguhet nga SHSKUK.
Pas këtyre diskutimeve të gjithë anëtarët kanë votuar pro angazhimit të ekspertit. /Gazeta Shneta/