Gjatë ditës së sotme, Ministri i Shëndetësisë Arben Vitija ka mbajtur një mbledhje virtuale me me kryetarët e komunave të Kosovës në lidhje me masat e planifikuara anti Covid.
Sipas Bordit të Asociacionit të Komunave të Kosovës (AAK) është vlerësuar rëndësinë e masave anti Covid, por nuk janë përkrahur masat e reja që sjellin kufizime.
Në anën tjetër, kryetarët e komunave kanë kërkuar respektimin e masave aktuale, duke u shtuar numri i inspektuesve, angazhimi i policisë dhe përkrahja me barna esenciale.
Shkrimin e plotë nga Bordi i AAK-së mund ta gjeni më poshtë:
Bordi i Asociacionit të Komunave të Kosovës në takimin e sotëm debatoi lidhur me mbylljen e paralajmëruar nga Qeveria e Kosovës në kuadër të parandalimit të përhapjes së pandemisë Covid-19.
Në këtë takim Bordi vlerësoi se është shumë e rëndësishme që masat kundër përhapjes së pandemisë Covid-19 të vazhdojnë të zbatohen në mbrojtje të shëndetit të qytetarëve tanë.
Por, Bordi në anën tjetër vlerëson se nuk i përkrah masat e reja që sjellin kufizime më të ashpra. Ky vlerësim vjen për arsye se, përkundër qëllimive të mira shëndetësore, kjo mbyllje do të ndikoj tepër rëndë në sektorë të caktuar të ekonomisë së vendit tonë.
Kryetarët e Komunave vlerësojnë se duhet të respektohen masat aktuale me rigorozitet, të rritet numri i aktiviteteve inspektuese, të rritet angazhimi dhe përkushtimi i policisë, të rritet edhe përkrahja me barna esenciale sepse ka ngecje serioze me furnizim. Nuk është mirë të ketë kufizime sepse është koha e të mbjellave, e edhe gastronomia është e lidhur me bujqësinë.
Poashtu Bordi i Asociacionit të Komunave të Kosovës vlerëson se institucionet qendrore dhe shëndetësore duhet të vazhdojnë konsultimet me Kryetarët e Komunave në nivel më të gjerë të përfshirjes, në mënyrë që të kemi vlerësim më real të gjendjes dhe bashkëpunimit mes nivelit qendror dhe lokal për formën dhe masat kufizuese.