Gjatë shtatzënisë mund të shfaqen lloje të ndryshme dhimbjesh barku. Disa prej tyre shkaktohen nga gazrat, kapsllëku ose urthi, dhe konsiderohen normale, pasi trupi pëson ndryshime për t’u përshtatur me rritjen e fetusit. Edhe kontraktimet Braxton Hicks mund të shkaktojnë shqetësime të padëmshme.
Megjithatë, disa dhimbje lidhen me gjendje serioze, si shtatzënia jashtë mitre ose humbja e shtatzënisë.
Të dish të dallosh llojet e ndryshme të dhimbjes ndihmon për të kuptuar hapat e ardhshëm për lehtësimin e saj, si dhe kur është e nevojshme të kërkosh menjëherë ndihmë mjekësore, shkruan burimi Very Well Health përcjell Gazeta Shneta.
Shkaqet e dhimbjes në pjesën e sipërme të barkut gjatë shtatzënisë
Shumë nga shkaqet e dhimbjes në pjesën e sipërme të barkut gjatë shtatzënisë janë të zakonshme dhe nuk paraqesin rrezik. Për shembull, gjatë tremujorit të parë, kjo dhimbje mund të ndodhë si rezultat i ndryshimeve fizike për të akomoduar fetusin që po rritet.
Megjithatë, në disa raste dhimbja në pjesën e sipërme të barkut mund të jetë shenjë paralajmëruese. Nëse dhimbja është nën brinjët, veçanërisht në anën e djathtë të trupit, duhet të kontaktoni menjëherë një mjek për të përjashtuar mundësinë e preeklampsisë.
Preeklampsia është një gjendje serioze që shfaqet pas javës së 20-të të shtatzënisë, dhe karakterizohet nga tension i lartë dhe prania e proteinave në urinë. Ajo prek rreth 5-8% të shtatzënive.
Shkaqet e dhimbjes në pjesën e poshtme të barkut gjatë shtatzënisë
Dhimbja në pjesën e poshtme të barkut mund të ndodhë ndërsa mitra zmadhohet. Ajo mund të shoqërohet me ngërçet dhe ndjeshmëri në zonën e fshikëzës, që mund të tregojë për një infeksion urinar (UTI). Këto infeksione janë të trajtueshëm gjatë shtatzënisë dhe zakonisht nuk shkaktojnë pasoja, por nëse nuk trajtohen, mund të çojnë në komplikime. /Gazeta Shneta/