Që nga fillimi i pandemisë COVID në janar 2020, rreth 768 milionë njerëz në mbarë botën janë infektuar me COVID-19.
Ndërsa COVID prek sistemin respirator, studimet e mëparshme tregojnë se ky sëmundje mund të çojë gjithashtu në probleme në pjesë të tjera të trupit, përfshirë sistemin kardiovaskular, shkruan burimi Medical News Today transmeton Gazeta Shneta.
Një studim i ri ka zbuluar se njerëzit që kanë kaluar COVID-19 kanë arterie më të ngurta krahasuar me ata që nuk e kanë pasur kurrë këtë infeksion viral. Shkencëtarët besojnë se ky ngurtësim i arterieve mund të shkaktojë plakje të hershme vaskulare deri në pesë vjet.
“Që në fillim të pandemisë, shkencëtarët kuptuan se SARS-CoV-2 nuk ishte thjesht një virus respirator, por kishte aftësinë të shkaktonte komplikime akute kardiovaskulare dhe të infektonte drejtpërdrejt qelizat vaskulare,” tha për MNT, Rosa Maria Bruno, profesore në farmakologji në Université Paris Cité në Francë.
“Ne ende po mësojmë se çfarë ndodh në trupin e njeriut në kohë afatgjate pas COVID-it. Është vërejtur një rrezik i shtuar i ngjarjeve kardiovaskulare, si infarkti miokardiak dhe goditja në tru, të cilat mund të parandalohen nëse ndryshimet e fshehta, si rritja e ngurtësisë së arterieve, zbulohen herët,” shtoi Bruno.
Bruno është autore kryesore e një studimi të ri të botuar së fundmi në “European Heart Journal”, që zbuloi se njerëzit që kanë kaluar COVID — edhe nëse kanë pasur një formë të lehtë të sëmundjes — kanë arterie më të ngurta krahasuar me ata që nuk e kanë kaluar kurrë COVID-in. Këto rritje në ngurtësinë arteriale u vunë re më shumë tek gratë sesa tek burrat, dhe më shumë tek personat me COVID të zgjatur.
Shkencëtarët besojnë se ky ngurtësim i arterieve mund të shkaktojë plakje të hershme vaskulare — ku sistemi vaskular është më i vjetër se mosha biologjike e personit — deri në pesë vjet. /Gazeta Shneta/