Ndërsa një pjesë e dhimbjeve gjatë shtatzënisë janë të zakonshme, dhimbja e fortë kërkon kujdes të menjëhershëm mjekësor.
Shkaqet e dhimbjes së barkut gjatë shtatzënnisë, janë përmbledhur në këtë artikull nga Very Well Health përcjell Gazeta Shneta:
Shtatzënia jashtë mitre
Kjo ndodh kur embrioni vendoset jashtë mitrës dhe zakonisht në tubat fallopiane. Shfaqet në rreth 1 në 50 shtatzëni. Kjo shtatzëni nuk mund të vazhdojë dhe mund të dëmtojë organet ku është vendosur. Shenjat përfshijnë dhimbje të forta dhe të mprehta në bark, zakonisht mes javës së 6-të dhe të 10-të të shtatzënisë.
Humbja e shtatzënisë (aborti spontan)
Humbja e shtatzënisë ndodh natyrshëm para javës së 20-të dhe prek rreth 15–20% të shtatzënive. Zakonisht nuk mund të parandalohet. Shenja kryesore është gjakderdhja, e shoqëruar me dhimbje të forta në shpinë, kontraktime çdo 5–20 minuta, si dhe dhimbje të barkut.
Kontaktoni mjekun menjëherë nëse vëreni gjakderdhje gjatë shtatzënisë.
Shkëputja e placentës
Dhimbja e vazhdueshme e barkut, e shoqëruar me forcim të barkut për një kohë të gjatë, mund të jetë shenjë e shkëputjes së placentës. Kjo mund të jetë e lehtë ose e rëndë, dhe shkaktohet nga ndarja e placentës nga mitra.
Faktorët e rrezikut për ndërlikime gjatë shtatzënisë
Faktorët që mund të rrisin rrezikun për ndërlikime janë:
– Sëmundjet ekzistuese, si diabeti i pakontrolluar.
– Mosha e nënës në momentin e shtatzënisë.
– Faktorë të stilit të jetesës, si pirja e duhanit.
– Shtatzënia me binjakë ose lindje të parakohshme në të kaluarën.
– Çrregullime gjenetike tek fetusi.
Si përshkruhet dhimbja e barkut gjatë shtatzënisë?
Jo të gjitha dhimbjet e barkut gjatë shtatzënisë janë të njëjta. Disa janë të forta dhe të vazhdueshme, ndërsa disa të tjera ndjehen si shqetësime të lehta. Ja disa përshkrime të zakonshme:
Dhimbja nga ligamenti i rrumbullakët
Gjatë lëvizjes në gjumë, ulje apo ngritje, mund të ndjeni një dhimbje të mprehtë dhe të shpejtë. Kjo ndodh kur zgjaten ligamentet që mbajnë mitrën. Kjo dhimbje është më e zakonshme gjatë tremujorit të dytë dhe prek rreth 10–20% të grave shtatzëna.
Dhimbja nga tretja
Gazrat dhe kapsllëku, të shkaktuara nga rritja e nivelit të progesteronit gjatë shtatzënisë, mund të sjellin dhimbje të barkut që zakonisht nuk janë shqetësuese. Edhe urthi mund të shkaktojë ndjesi të pakëndshme në pjesën e sipërme të barkut.
Kontraktimet Braxton Hicks
Këto nuk janë kontraktime të vërteta të lindjes. Mund të fillojnë që në tremujorin e dytë, por bëhen më të shpeshta kur i afroheni datës së lindjes. Janë shtrëngime të muskujve të mitrës dhe ndjehen më shumë si shqetësim sesa dhimbje. Zakonisht zgjasin 15–30 sekonda dhe ndryshojnë në intensitet. /Gazeta Shneta/