Historia psikiatrike e baballarëve dhe e nënave është e lidhur me lindjen e parakohshme të fëmijës, sipas një studimi të botuar më 20 korrik në revistën me akses të hapur “PLOS Medicine”.
Hulumtimi tregon për herë të parë se rreziku i lindjes së parakohshme është më i lartë tek foshnjat, baballarët ose nënat e të cilëve kanë diagnoza psikiatrike, shkruan Medical Xpress përcjell Gazeta Shneta.
Lindja e parakohshme shoqërohet me pasoja negative shëndetësore për foshnjat. Gratë me diagnoza psikiatrike janë në rrezik të shtuar të lindjes së parakohshme, por më pak dihet për rrezikun tek pasardhësit e baballarëve me diagnoza psikiatrike dhe për çiftet ku të dy prindërit kishin diagnoza psikiatrike.
Weiyao Yin dhe kolegët nga Instituti Karolinska analizuan të dhënat për të gjitha lindjet e gjalla të prindërve nordikë në Suedi midis 1997 dhe 2016. Ata morën diagnoza psikiatrike nga Regjistri Kombëtar i Pacientëve dhe të dhëna për moshën gestacionale nga Regjistri Mjekësor i Lindjeve.
Ka pasur 1.5 milionë lindje në grup, nga të cilat 15% kanë lindur nga prindër me diagnozë.
Ekipi vëzhgoi një prirje drejt moshës së hershme gestacionale tek pasardhësit e prindërve me çrregullime psikiatrike.
Për prindërit pa diagnozë, 5.8% e foshnjave kanë lindur para kohe. Një diagnozë psikiatrike nga babai rrit rrezikun në 6.3% të lindjeve dhe një diagnozë nga nëna rrit rrezikun në 7.3% të lindjeve.
Megjithatë, kur të dy prindërit kishin një diagnozë të tillë, rreziku i lindjes së parakohshme ishte më i madh, duke prekur 8.3% të lindjeve.
Studiuesit zbuluan gjithashtu se rreziku ishte rritur më tej për prindërit – nënat si dhe baballarët – me disa çrregullime psikiatrike bashkëekzistuese.
Studimet e ardhshme duhet të shqyrtojnë nëse mbështetja shtesë sociale dhe kujdesi prenatal për familjet me një histori psikiatrike pozitive mund të kenë ndikim në moshën gestacionale. /Gazeta Shneta/